Автотранспорт воситасидан фойдаланишда яқин қариндошлар учун ишончнома олиш тизимини бекор қилишни таклиф қилган онлайн-петиция 13 мингдан ортиқ овоз йиғди. Бу ҳақда «Газета.uz» хабар берди.
Мазкур таклиф октябрь ойида «Менинг фикрим» жамоавий мурожаатлар порталига жойланганди. Петиция муаллифи Амирбек Кенжаев бундай ишончномани расмийлаштириш учун ҳужжат йиғиш жуда кўп вақт ва пул талаб қилишини қайд этган. Муаллиф ота-она, фарзанд, ака-ука, опа-сингилларнинг бир-бирига ишончнома бериши миллий қадрият ва менталитетимизга тўғри келмаслигини айтган.
«1990 йилларда машина ўғирлаш билан боғлиқ воқеалар кўп эди. Балки ўша пайтда бу тизим ўзини оқлагандир. Лекин ҳозиргидай юртимиз инновацион жиҳатдан ривожланиб бораётган, «Хавфсиз шаҳар» тизими ишга туширилган, йўлларимизда видеокамералар ишлаб турган пайтда бунақа ишончнома бериш тартибига зарурат бормикан?» — деган саволни ўртага ташлаган муаллиф.
Петицияга айни дамда «кўриб чиқилмоқда» деган статус берилган. Портал қоидаларига кўра, Ўзбекистон Олий Мажлис палаталарига амалга оширилган мурожаат 10 мингдан ортиқ овоз тўплаши лозим. Мурожаатларни кўриб чиқиш ва қарор қабул қилиш муддати 60 кундан ошмайди. Мазкур петицияга овоз бериш 12 кундан сўнг ниҳоясига етади.
Изоҳ (0)