«Ўзэлтехсаноат» компанияси негизида уюшма ташкил этилади
«Ўзэлтехсаноат» АК негизида унинг мол-мулки ва давлатга тегишли бошқа воситалар, шунингдек, дебитор ва кредитор қарздорлигини ўтказган ҳолда Ўзбекистон электротехника саноати корхоналари уюшмасини ташкил этилади. Бу Президентнинг «Электротехника саноатининг экспорт салоҳиятини янада ривожлантириш ва ошириш чора-тадбирлари тўғрисида»ги қарорида кўзда тутилган.
«Ўзэлтехсаноат» АКга тегишли хўжалик жамиятларининг кўчмас мулки ва устав капиталидаги акциялар пакети (улуши) Рақобат қўмитасига ўтказилади.
«Ўзэлтехсаноат» уюшмаси таркибига кирадиган электротехника ва электр-маиший маҳсулотлар ишлаб чиқарувчи корхоналарга 2022 йилнинг 1- январига қадар ўзининг асосий ва ёрдамчи ишлаб чиқариши учун бутловчи буюмлар, хом ашё ва материаллар, шунингдек, улар томонидан амалга ошириладиган инвестиция лойиҳалари доирасида олиб келинадиган қурилиш материаллари импортида божхона декларацияси қабул қилинган кундан бошлаб қўшилган қиймат солиғини тўлашни 120 кунга кечиктириш имконияти берилади.
2022 йилнинг 1 январига қадар:
«Ўзэлтехсаноат» уюшмаси мол-мулк солиғи ва юридик шахслардан олинадиган фойда солиғи тўлашдан озод этилади;
шартномалар бўйича ташкилотларнинг «Ўзэлтехсаноат» уюшмасига ажратмалари юридик шахслардан олинадиган фойда солиғи бўйича солиқ солинадиган базадан чиқарилади.
Электротехника саноатида инвестиция лойиҳаларини амалга ошириш бўйича «Йўл харитаси»да қуйидагилар кўзда тутилган:
Амалдаги электротехника корхоналарини техник ва технологик жиҳатдан янгилаш ва янгиларини ташкил этиш бўйича 153,8 миллион АҚШ доллари миқдоридаги 22 та инвестиция лойиҳаларини 2019—2021 йилларда амалга ошириш;
2021 йилга юқори қўшилган қийматли тайёр электротехника ва электр-маиший маҳсулотларни ишлаб чиқариш ҳажмларини 2 бараварга ошириш;
2021 йилда тайёр электротехника ва электр-маиший маҳсулотларнинг экспорт ҳажмини 400 миллион АҚШ доллари миқдорига эришиш;
Лойиҳа қиймати 500 миллион АҚШ доллари бўлган истиқболли инновация лойиҳаларини биргаликда амалга ошириш учун хорижий инвесторларни жалб этиш.
