Ўзбекистонда 16 та қишлоқ ва 5 та маҳалланинг қиёфаси ўзгарди

Ўзбекистонда қишлоқлар қиёфаси тубдан ўзгариб, яшаш учун замонавий шароитлар яратилмоқда, деб ёзади ЎзА.

2018 йилда Навоий вилоятининг 16 та қишлоғида «Обод қишлоқ» дастури доирасида 334 миллиард сўмлик, «Обод маҳалла» дастури доирасида эса 5 та маҳаллада 65 миллиард сўмлик иш қилинди. Хусусан, Навоий шаҳридаги «Тинчлик» маҳалласида кенг кўламли бунёдкорлик ишлари амалга оширилиб, янги қиёфадаги маҳаллада Янги йил байрами ўтказилди.

– Ҳудудда кўплаб янги бинолар қад ростлади. Амфитеатр, ҳаммом, футбол майдончаси, болалар майдончалари янгидан қурилди. Мактаб, боғча, маҳалла гузари, автошохбекат каби объектларда таъмирлаш ишлари амалга оширилди. 6,8 километр ичимлик суви, 2,5 километр табиий газ, яна шунча электр, 32 километр ирригация ва мелиорация тармоқлари янгитдан барпо этилди. 8 километр ички йўллар, 10 километр пиёдалар йўлаги қурилди, – дейди «Тинчлик» маҳалла фуқаролар йиғини раиси Дилмурод Холов.

Шу билан бирга Кармана туманидаги Ҳазора қишлоғида ҳам бунёдкорлик ишлари якунига етказилди. Ҳудудда 32 километр ичимлик суви тармоғи, 45 километр газ, 9,5 километр электр тармоғи янгиланди. 16 километр ички йўллар, 1 километр пиёдалар йўлагиқурилиб, тунги ёритиш чироқлари ўрнатилди. Мактаб, болалар боғчаси, хаммом, сунъий қопламали мини футбол майдончаси, болалар майдончаси, оталар чойхонаси, маҳалла гузари, қишлоқ оилавий поликлиникаси, амфитеатр қайта таъмирланди.