ЎзА бир қанча ўзбекистонликлар орасида «Йил давомида мобил телефонингизга энг кўп келган хабар» қайси мавзуда бўлди? деган йўналишда сўров ўтказди. Уларнинг қарийб 70 фоизи Туризмни ривожлантириш давлат қўмитаси рус ва ўзбек тилида юборган «Ҳурматли тадбиркорлар! Замонавий ва озода жамоат ҳожатхонаси ташкил этинг ва солиқ имтиёзига эга бўлинг». мазмунидаги SMS «жонга тегиб» кетгани ҳақида айтишди. Айримлар буни тўғри тушунишини ҳам маълум қилди.
Ахир, санитария-гигиена шохобчаларини ривожлантириш туризм инфратузилмасини ажралмас қисми ҳисобланади. Шу боис жамоат жойлари ва объектларда санитария-гигиена шохобчаларини ташкил этишга эҳтиёж юқори.
– Шунинг учун, тадбиркорларга бир қатор имтиёзлар берилди, –дейди Туризмни ривожлантириш давлат қўмитаси бўлим бошлиғи Ўткир Холбадалов. –Хусусан, хўжалик юритувчи субъектларининг санитария-гигиена шохобчаларини қуриш, қайта тиклаш ва капитал таъмирлашга сарфлаган 100 миллион сўмгача бўлган харажатига солиқ солинмайди. Бунда, солиқ солинадиган базанинг 100 миллион сўмгача камайиши, бир марталик ёки қисмларга бўлинган ҳолда, 2020 йил 1 январь муддатигача амалга оширилади. Мисол учун, жорий йилнинг сентябрь октябрь ойларида тадбиркор ўз ҳудудида барча мижоз ва йўловчилар фойдаланишлари учун санитар-гигиена шохобчасини 60 миллион сўмга қуриб, фойдаланишга топширди. Унинг учинчи чоракда солиққа тортиладиган даромади 80 миллион сўм бўлса, солиқни фақатгина 20 миллион сўм учун тўлайди.
Бунинг яна бир қулай жиҳати бор. Агарда тадбиркор туризм инфратузилмаси объектларида — тарихий ва меъморий ёдгорликлар, музейлар, театрлар, маданият уйлари, автомобилларга ёқилғи қуйиш шохобчалари, автомобиллар учун вақтинча тўхташ жойлари, расталар, дўконлар каби одамлар гавжум бўладиган жойларда санитария-гигиена шохобчаларини сақлаш учун қилган харажатларини 12 миллион сўмгача бўлган миқдордаги харажатларига солиқ солинмайди. Масалан, тадбиркор ўз ҳудудидаги умумий овқатланиш нуқтасида йўловчилар фойдаланиши учун ташкил қилган санитар-гигиена шохобчасини тоза сақлаш учун ойига бир миллион сарфлади. Солиқ олинаётганда ушбу сумма чиқариб ташланади.
Йил давомида юборилган SMSлар, яратилган имтиёзлар ва қулайликлар тадбиркорларни қай даражада ўзига жалб этди. Натижа қандай? Қайси ҳудудларда намунавий типдаги санитар-гигиена шохобчалари қурилди, деган саволимизга мутахассис шундай жавоб берди.
«Албатта, бу ўз самарасини берди. Бир қатор мисоллар келтиришим мумкин. Мисол учун, Қашқадарё вилояти, Китоб туманидаги Тахтақорача довонида 60 миллион сўмлик лойиҳа бажарилди. Натижада халқаро М39 автомагистрал йўли бўйида 4 хонали — таҳоратхона, аёл ва эркаклар ҳамда имконияти чекланган шахслар учун махсус ҳожатхона қурилди. Жиззах вилоятининг Шароф Рашидов туманида бажарилган иккита лойиҳа ҳам самарали бўлди. Улардан бирига қарийб 100 миллион сўм сарфланиб, 6 хонали санитария-гигиена шохобчаси қурилди. Таҳоратхона, аёл ва эркаклар ҳамда имконияти чекланган шахслар учун махсус ҳожатхона, ювиниш хонаси яна бирида қарийб 30 миллион эвазига спорт комплекслари ва кичик савдо мажмуалари ёнида барпо этилган санитария-гигиена шохобчаси қурилди».
Изоҳ (0)