Гулистон шаҳрида Янги йил байрами куни ўз фаолиятини бошлаган «Учрашув» кафесида вилоят ҳокими Ғофуржон Мирзаев халқаро ва мамлакат миқёсидаги беллашув, танлов ва фан олимпиадаларида юқори натижаларга эришган ёш спортчилар, истеъдодли ёшлар билан учрашув ўтказди. Бу ҳақда ЎзА хабар берди.
Ҳоким вилоят ёшларининг турли танловларда эришаётган ютуқлари, айниқса сирдарёлик ёш спортчилар жаҳон миқёсидаги спорт беллашувларида мамлакат шарафини муносиб ҳимоя қилаётганларини фахр билан тилга олди.
Вилоятда амалга оширилаётган ва оширилиши режалаштирилган бунёдкорлик ишлари, ёш тадбиркорлар учун ажратилаётган банк кредитлари, яратилаётган янги иш ўринлари тўғрисида ҳам атрофлича тўхталди.
Тадбирда вилоят ҳокимига Ўзбекистон ёшлар иттифоқи марказий кенгашининг ташаккурномаси топширилди.
Ёшлар турли масалалар юзасидан вилоят ҳокимига ўзларини қизиқтирган саволлар билан мурожаат қилди. Ҳар бир савол, масалага аниқ ва атрофлича жавоб берилиши билан бирга, ёшларни қийнаётган муаммоларни бартараф этиш бўйича зарур чора-тадбирлар белгиланди.
Изоҳ (0)