Адлия вазирлиги: Дам олиш ва байрам кунлари ишлаганларга икки ҳисса миқдорда ҳақ тўланиши лозим

Ўзбекистон Президентининг фармонига мувофиқ, ҳафтасига беш кун ишловчилар учун 30 декабрь, 31 декабрь, 1 январь, 2 январь ва 3 январь кунлари (жами беш кун), ҳафтасига олти кун ишловчилар учун эса 30 декабрь, 1 январь ва 2 январь (жами уч кун) дам олиш куни этиб белгиланган.

Ўзбекистон Адлия вазирлигининг тегишли идоралар хабарига асосланиб маълум қилишича, якуний ҳисоб-китобларни амалга оширишда аҳолига қулайлик яратиш мақсадида банк, молия ҳамда солиқ идораларининг айрим ходимлари томонидан 2018 йил 30 (якшанба) ва 31 декабрь (душанба соат 15:00 гача) кунлари ҳам хизматлар кўрсатилади.

«Эслатиб ўтамиз, дам олиш кунлари ва байрам кунларидаги ишлар учун камида икки ҳисса миқдорида ҳақ тўланиши ёки ходимнинг хоҳишига қараб бошқа дам олиш куни (отгул) бериш билан қопланиши лозим», — дейилади вазирликнинг Telegramдаги канали орқали тарқатилган ахборотда.