Фарғонада бошланган адабиёт байрами «Эркин Воҳидов кунлари» доирасидаги тадбирлар билан янада катта шодиёна айланди. Унда пойтахтдан ташриф буюрган таниқли шоир ва ёзувчилар, адабиётшунос олимлар, кенг жамоатчилик вакиллари иштирок этмоқда, дея хабар беради ЎзА.
Президент жорий йилнинг 12—13 июнь кунлари Фарғона вилоятига ташрифи чоғида Марғилон шаҳридаги ижодкорлар боғида бўлиб, Эркин Воҳидов ижодини ўрганиш ва ёшларга ўргатиш, шеърлари асосида қўшиқлар яратиш зарурлиги таъкидлаган эди. Мазкур адабиёт байрами ва Эркин Воҳидов кунлари ҳам шу мақсадда ташкил этилди.
Давлат раҳбарининг 2016 йил 7 декабрдаги «Ўзбекистон халқ шоири Эркин Воҳидов таваллудининг 80 йиллигини нишонлаш тўғрисида»ги қарори асосида ўзбек адабиёти ривожига улкан ҳисса қўшган адиб ижодий меросини ўрганиш ва уни ёшларга етказиш йўлида қатор ишлар амалга оширилмоқда.
Президент ташаббуси билан Марғилон шаҳрида ижодкорлар боғи ташкил этилиб, Эркин Воҳидовнинг ҳайкали ўрнатилди ва мемориал музейи бунёд этилди. Шунингдек, Эркин Воҳидов номидаги она тили ва адабиёти фанини чуқур ўқитишга ҳамда хорижий тилларга ихтисослаштирилган мактаб-интернат ташкил этилди.
Нафосат байрами Қўқон шаҳридаги драма театрида Эркин Воҳидов ижодига бағишланган учрашув билан бошланди. Тадбирда Эркин Воҳидов Ватан, инсон эрки, муқаддас заминни улуғлаб битган шеър ва ғазаллари, достонлари, драмалари билан ўқувчилар қалбидан мустаҳкам ўрин эгаллаган улуғ ижодкор экани таъкидланди.
Изоҳ (0)