Фарғона вилояти Учкўприк тумани Тепақўрғон қишлоғида яшовчи фуқаро Сардор Тўрақулов туман истеъмолчилар ҳуқуқларини ҳимоя қилиш жамиятининг «1091» қисқа рақамли ишонч телефонига қилган мурожаати ўрганиб чиқилди. Бу ҳақда ЎзА хабар берди.
Истеъмолчи ўз мурожаатида туман газ идораси томонидан аҳолига, жумладан ўзи яшаб келаётган ҳудуддаги хонадонларга суюлтирилган газ етказиб беришдаги узилишлардан норозилигини билдириб, истеъмолчи сифатидаги ҳуқуқ ва манфаатларини ҳимоя қилинишини сўраган.
Туман истеъмолчилар ҳуқуқларини ҳимоя қилиш жамияти мутахассислари фуқаро мурожаатига аниқлик киритиш мақсадида унинг хонадонига борди. Ҳақиқатан ҳам истеъмолчига газ баллони берилганлиги, лекин уч ойдан буён газ баллонини суюлтирилган газ билан тўлдирилганига алмаштира олмаётгани аниқланди.Истеъмолчи С. Тўрақулов мурожаати асосида Фарғона вилояти бўйича газ таъминоти ҳудудий филиали
Учкўприк тумани бўлими бошлиғи Б. Собиров огоҳлигида Ўзбекистон Республикасининг «Истеъмолчилар ҳуқуқларини ҳимоя қилиш тўғрисида»ги ва «Жисмоний ва юридик шахсларнинг мурожаатлари тўғрисида»ги қонунлари ва истеъмолчи томонидан тақдим қилинган ҳужжатлар асосида ўрганиб чиқилди.
Ўрганишлар натижасида жойларда аҳоли хонадонларини суюлтирилган газ баллони билан таъминлашда график бўйича тарқатилаётганлиги, газ таъминотида узилишлар сабабли тумандаги қишлоқларга етказиб берилаётган суюлтирилган газ баллони тарқатишда графикдан ортда қолганлиги аниқланди.
Масъулларга суюлтирилган газ етказиб бериш бўйича тасдиқланган жадвалга қатъий риоя этиш, аҳоли мурожаатларига эътиборли бўлиш, шартнома шартларига риоя этиш каби ҳолатлар ҳам таъминотчи ҳам истеъмолчилар муносабатларини фақат яхшилашга хизмат қилиши тушунтирилди. Ўрганиш давомида С. Тўрақулов суюлтирилган газ билан таъминланган.
Изоҳ (0)