БМТ Бош Ассамблеясининг 73-сессия делегатлари Қримни милитаризациялаш, шунингдек Қора ва Азов денгизлари ҳудудлари тўғрисида резолюция қабул қилди, деб хабар берди Sputnik БМТ Янгиликлар марказига таяниб.
Қримни ҳарбийлаштириш ҳамда Қора ва Азов денгизлари ҳудудлари тўғрисидаги резолюцияни Украина бошқа 40 та давлат билан ҳаммуаллифликда кўриб чиқиш учун киритган эди.
«Россия қўшинларининг Қримда мавжуд бўлиши Украина миллий суверенитети, сиёсий мустақиллиги ва ҳудудий яхлитлигига зид ва қўшни мамлакатлар ва Европа минтақаси хавфсизлиги ва барқарорлигига раҳна солади». Унда «Россиянинг босиб олувчи мамлакат сифатида Қримни ҳарбийлаштиришни кучайтираётгани муносабати билан» жиддий хавотирлар келиб чиқади», — дейилган резолюция матнида.
Муаллифлар яқинда Қора денгизда содир бўлган ҳолат туфайли қарама-қаршиликнинг зўрайиб бораётганини таъкидлади. 25 ноябрь куни Россия чегарасини бузган Украина Ҳарбий-денгиз кучларига тегишли уч кема қўлга олинган эди.
БМТ Бош Ассамблеяси Россияни кемаларни ҳамда уларнинг экипажлари ва ускуналарини озод қилиш, шунингдек Украинанинг Қора ва Азов денгизлари, Керчь бўғозидаги навигацион ҳуқуқ ва эркинликларига тўсқинлик қилмасликка чақирди. Ҳужжатда Россиянинг Керчь бўғози орқали кўприк қургани ҳам қораланган.
«Бош Ассамблея Россиядан қатъий равишда босиб олувчи мамлакат сифатида ўз қуролли кучларини Қримдан олиб чиқиб кетиш ва зудлик билан Украина ҳудудини вақтинча истило қилишга барҳам беришга чақиради», — дейилган қабул қилинган резолюцияда.
Мазкур резолюцияни 66 та мамлакат қўллаб-қувватлади, 19 та давлат қарши чиқди. 72 та делегация бетараф қолди. Арманистон, Беларусь ва Ўзбекистон резолюцияга қарши овоз берди. Қозоғистон ва Қирғизистон делегацияси бетараф қолди. Озарбайжон, Тожикистон, Туркманистон вакиллари овоз беришда иштирок этмади.
Россия вакили Дмитрий Полянский қабул қилинган резолюцияни «Украинанинг зарарли ҳаракати» деб атади. Россия нуқтаи назаридан Қримнинг тегишлилик масаласи узил-кесил ва тамомила ҳал этилганини қўшимча қилди.
Изоҳ (0)