Жиноят ишлари бўйича Бўстонлиқ тумани суди томонидан озодликни чеклаш ва аҳлоқ тузатиш ишлари жазоси тайинланган 8 нафар маҳкум муддатидан олдин шартли равишда озод этилди. Бу ҳақда Тошкент вилояти ички ишлар бошқармаси хабар қилмоқда, деб ёзади ЎзА.
Хабарда қайд этилишича, жазо турлари учун ўрнатилган тартиб-қоида талабларини бажариб, тузалиш йўлига ўтган озодликни чеклаш жазоси тайинланган 4 нафар ва яна 4 нафар ахлоқ тузатиш ишлари жазоси тайинланган фуқаро ўталмаган жазо муддатидан илгари шартли равишда озод қилинди. Шунингдек, улар жазоларнинг ижросини назорат қилиш гуруҳи ҳисобидан ҳам чиқарилди.
– Жиноятчилик ва ҳуқуқбузарликларнинг олдини олиш, уларнинг келиб чиқиш сабабларини аниқлаш ва бартараф этиш, жумладан озодликдан маҳрум этиш билан боғлиқ бўлмаган жазоларнинг ижросини назорат қилиш гуруҳлари ҳисобида турувчи маҳкумлар билан профилактик суҳбатлар ўтказиш, бандлигини таъминлаш ва уларни соғлом турмуш тарзига қайтариш юзасидан мунтазам тарғибот ишлари олиб борилмоқда, – дейди вилоят ИИБ ҳуқуқбузарликлар профилактикаси бошқармаси катта инспектори, майор Х.Барноев. – Бундан кўзланган асосий мақсад – жиноятга жазо муқаррарлигини тушунтириш баробарида, жамиятда адолат, инсонийлик тамойилларининг устуворлигини таъминлаш, адашиб жиноят кўчасига кирган фуқароларни жамиятга қайтариш, соғлом ижтимоий муҳитни қарор топтиришдир.
Сайёр суд мажлисида шунингдек, фуқаро Ў.О. ва Р.В.нинг иши кўриб чиқилди. Ушбу фуқароларга нисбатан муқаддам суд томонидан аҳлоқ тузатиш жазоси тайинланган бўлиб, улар мазкур жазони ўташдан қасддан бўйин товлаган. Айни шу боисдан судда фуқаро Ў.О. ва Р.В.нинг ўталмаган жазо муддати худди шунча муддатга озодликдан маҳрум қилиш жазосига алмаштирилди.
Изоҳ (0)