Сурхондарёда талабга жавоб бермайдиган 16 қишлоқ врачлик пункти фаолияти тўхтатилди

Сурхондарё вилоятида сўнгги икки йилда аҳолига тиббий хизмат кўрсатиш тизими тубдан ўзгарди, деб хабар бермоқда ЎзА.

Хусусан, тез тиббий ёрдам станция ва шохобчалари 110 тага етказилиб, малакали мутахассислар билан таъминланди. Бирламчи тиббиёт муассасалари мақбуллаштирилиб, моддий-техник базаси мустаҳкамланаётир. 245 қишлоқ врачлик пунктининг 94 таси қишлоқ оилавий поликлиникасига, 55 таси тез ёрдам шохобчасига айлантирилди. Талабга жавоб бермайдиган 16 қишлоқ врачлик пункти фаолияти тўхтатилди.

Соҳада мавжуд муаммолар, жойларда учраётган касалликлар чуқур ўрганилиб, туманларда ихтисослаштирилган тиббий бўлимлар ташкил этилмоқда. Икки йилда 8 та туман тиббиёт бирлашмасида 405 ўринли кардиология, неврология, травматология, эндокринология, урология каби ихтисослаштирилган тиббий бўлимлар фаолияти йўлга қўйилди. Йилнинг ўтган даврида Республика ихтисослаштирилган кўз микрохирургияси ва Республика урология марказининг Термиз филиаллари ташкил этилиб, энг мураккаб жарроҳлик амалиётлари шу ернинг ўзида ўтказилмоқда. Бу – кўплаб беморларнинг шифо излаб, пойтахт ва бошқа шаҳарларга боришига чек қўйди. Янги йилгача Республика перинатал марказининг Термиз филиали ҳам фойдаланишга топширилади. Бу Ўзбекистонда ягона бўлган перинатал марказ бўлади. Барча шароитларга эга замонавий муассасада репродуктив саломатлик бўлими, скрининг маркази барпо этилиб, битта мажмуа сифатида хизмат кўрсатади.

Жорий йилга мўлжалланган Инвестиция дастури доирасида 20 дан ортиқ тиббиёт муассасасида 104 миллиард сўмликдан ортиқ қурилиш-реконструкция ва таъмирлаш ишлари амалга оширилмоқда. Йилнинг ўтган даврида уларнинг аксарияти фойдаланишга топширилиб, моддий-техник базаси мустаҳкамланди. Йил охиригача қолган иншоотлар ҳам беморларни тўлиқ қабул қила бошлайди. Муҳими, ушбу муассасалар бир йўла замонавий хориж ускуналари билан таъминланмоқда.