14 декабрнинг асосий янгиликлари — «Дарё» дайжестида.
Ўзбекистонда хизмат кўрсатган артист, таниқли сўз устаси Обид Асомов 14 декабрь куни Тошкентдаги 1-шаҳар клиник шифохонасида вафот этди. У 55 ёшда эди. Бир неча кун муқаддам Обид Асомов юрак хуружи билан касалхонага ётқизилгани ҳақида хабарлар берилган эди. Марҳум Обид Асомов 15 декабрь куни «Камолон» қабристонида дафн этилади.
***
14 декабрь куни тахминан соат 10:00 да Наманганда қаттиқ гумбурлаш овози эшитилган. Кучли зарбдан дераза ойналари ҳам ларзага келган. Бу каби ҳолат 6 декабрь куни ҳам кузатилганди. Ўшанда аввалига Мингбулоқ нефть конида портлаш юз бергани хабар қилинди, кейин эса расмийлар бу хабарни рад этиб, ҳудудда ҳеч қандай портлаш содир бўлмаганини таъкидлашди.
***
Ишга қабул қилишда эндиликда прописка талаб қилинмайди. Бу ҳақда Маъмурий жавобгарлик тўғрисидаги кодекс ва Меҳнат кодексига тегишли ўзгартиришлар киритилди.
Хусусан, Маъмурий жавобгарлик тўғрисидаги кодексдан вақтинча ёки доимий пропискасиз яшаб турган фуқароларни ишга қабул қилганлик учун иш берувчини маъмурий жавобгарликка тортишга асос бўлувчи 223-2-модда чиқариб ташланди.
Худди шундай, Меҳнат кодексидан ҳам ишга кираётган шахс вақтинча ёки доимий пропискасиз ёхуд турган жойи бўйича ҳисобда турмаган бўлса ишга қабул қилишни рад этиш мумкинлиги ҳақидаги қоида чиқариб ташланди.
***
14 декабрь куни ҳам Президент Шавкат Мирзиёевнинг Қашқадарё вилоятига ташрифи давом этди. Ташриф давомида Шаҳрисабз шаҳри, Қамаши, Косон ва Яккабоғ туманлари ҳокимлари ўзгарди. Шавкат Мирзиёев 14 декабрь куни Қарши шаҳрида Биринчи Президент Ислом Каримов ҳайкали пойига гул қўйиб, унинг хотирасига ҳурмат бажо келтирди. Президент Қарши шаҳрида барпо этилган «Ватанпарварлар» боғини бориб кўрди. Шунингдек, Қарши шаҳридаги янги сув спорти мажмуаси билан танишди.
***
Наманган шаҳрининг Ислом Каримов ва Ирригатор кўчалари чорраҳасига янги намунадаги светофор қурилмаси ўрнатилди. Ушбу қурилманинг ўзига хослиги шундаки, светофорнинг чироқлари рангига қараб светофор аркаси ҳам шу рангда ёнади. Бу ҳайдовчилар эътиборини жалб этиб, ҳушёрлигини ошириб, светофор ишорасига амал қилмасдан ўтиш эҳтимолини камайтиради ва ҳаракат хавфсизлигини таъминлашга хизмат қилади.
Изоҳ (0)