Журналистларнинг ахборот тарқатишдаги масъулиятини кучайтириш, учраётган айрим камчиликлар таҳлили асосида уларнинг ҳуқуқий билимини янада ошириш, материаллар тайёрлашда фуқаролар ва юридик шахсларнинг шаъни ва қадр-қимматини ёки ишчанлик обрўсини таҳқирлаш, шахсий ҳаётига аралашиш ҳолатларининг олдини олиш мақсадида Адлия вазирлиги томонидан журналистлар учун махсус семинар-тренинг ташкил этилди. Бу ҳақда вазирлик матбуот хизмати «Дарё»га маълум қилди.
Семинар-тренингда ахборот соҳасида касб масъулиятининг чегаралари, журналистлик фаолиятини тартибга солувчи ҳуқуқий ва этик нормалар, журналист томонидан фуқароларнинг шаъни ва қадр-қимматини ёки ишчанлик обрўсини таҳқирлаш ёки шахсий ҳаётига аралашиш ҳолатларининг олдини олиш, журналистика соҳасида эски қолипдан воз кечиш, инсон онгига номақбул таъсир кўрсатиши мумкин бўлган махсус ахборотлар тарқатиш, сездирмаган ҳолда тажовузкорлик ва ахлоқсизликни тарғиб қилиш учун жавобгарликни белгилаш, аҳолининг ОАВ орқали ишончли ва ҳаққоний ахборотни олиш ҳуқуқини бузиш ҳолатларининг олдини олиш масалалари атрофлича муҳокама қилинади.
Семинар-тренинг давомида иштирокчиларга махсус қўлланма тарқатилади. Қўлланмада замонавий медиа майдонда ахборот тарқатишга доир муҳим жиҳатлар, журналистларнинг ҳуқуқ ва мажбуриятлари, блогерликнинг ҳуқуқий асослари, ахборот ҳаққонийлиги масалалари ёритилган ҳамда соҳага оид қонунчиликдан кўчирмалар киритилган.
Изоҳ (0)