Наманганда Конституция байрами арафасида янги тиббиёт масканлари ишга туширилди. Бу ҳақда «Дарё» мухбири хабар бермоқда.
Конституция байрами арафасида Наманган шаҳрида очилган REMEDY medical center саломатлик маркази асосан ташхис қўйишга мўлжалланган бўлиб, лойиҳани амалга ошириш учун 1 миллиард сўмдан зиёд маблағ сарфланди, 15 та янги иш ўрни яратилди. Мазкур масканга хориждан видеоэндоскопия, лор-комбайн ва бошқа тиббий-диагностика жиҳозлари келтирилди.
Вилоят марказида «Ойдин шифо» касалхонасининг иккинчи навбати ҳам фойдаланишга топширилди. Уни қуриб битказиш учун 8 миллиард сўм сарфланди, 3 миллиард сўмга энг замонавий тиббий анжомлар харид қилинди.
— Шифохонамизда республика хусусий тиббиёт муассасалари ичида биринчилардан бўлиб бир қатор янги йўналишлар бўйича хизматлар жорий қилинди. Хусусан, юрак-қон томир касалликлари реабилитацияси бўлими очилди. Жарроҳлик бўлимида эса қорин бўшлиғидаги касалликлар лапораскопик усулда даволанмоқда, — дейди мазкур тиббиёт муассасаси бош шифокори, тиббиёт фанлари доктори Мирмаҳмуд Мирсайдуллаев.
Касалхонанинг иккинчи навбати ишга тушганидан сўнг бу ерда бир пайтнинг ўзида 300 нафар беморни қабул қилиш имконияти яратилди.
Вилоят соғлиқни сақлаш бошқармаси матбуот хизмати раҳбари Абдулла Ғозиевга кўра, Наманган вилоятидаги хусусий тиббиёт масканлари сони 321 тадан ошди. Улардан 43 таси шу йилнинг ўзида ишга туширилган.
Изоҳ (0)