Фарғона вилоятида мудофаа вазирининг биринчи ўринбосари — Қуролли Кучлар Бош штаби бошлиғи генерал-майор Павел Эргашев Ўзбекистон Республикаси Конституциясининг 26 йиллиги муносабати билан ҳарбий хизматчиларни тақдирлади. Бу ҳақда вазирлик матбуот хизмати «Дарё»га маълум қилди.
Ҳарбий хизматчиларга Мудофаа вазирлиги кўкрак нишонлари, эсдалик совғалари ҳамда дипломлар топширилди. Уларнинг келгусидаги хизматларига зафарлар тиланди.
Қуролли Кучлар давлат музейида эса Мудофаа вазирлиги фахрийлари учун байрам тадбири ташкиллаштирилди. Тадбир давомида ёш авлодни ҳарбий-ватанпарварлик руҳида тарбиялашга муносиб ҳисса қўшиб келаётган фахрийларга Мудофаа вазирининг кўкрак нишонлари тантанали равишда топширилди.
Шунингдек, Тоифаланган объектларни қўриқлаш қўшинларига қарашли ҳарбий қисм ҳарбий хизматчилари ўртасида «Конституция – бахтимиз қомуси» мавзусида тантанали йиғилиш бўлиб ўтди.
Йиғилишда Ўзбекистон Ёзувчилар уюшмаси Қашқадарё вилояти бўлими раҳбари Ўроз Ҳайдар ҳамда шоира Нилуфар Умарова, «Эл-юрт ҳурмати» ордени соҳиби, актёр Исоқ Тўраев иштирок этди. Тадбир давомида байрам муносабати билан бир қанча ҳарбий хизматчилар рағбатлантирилди. Байрам якунида Қарши гарнизони Маънавият ва маърифат маркази ҳарбий оркестри ва вилоят санъаткорларининг концерт дастурлари намойиш этилди.
Изоҳ (0)