Фарғона вилоятининг Данғара туманида Ўзбекистон Қуролли Кучлари ва ҳамкор идораларнинг 2018–2019 ўқув йили учун мўлжалланган дастурига кўра «Ҳудуд хавфсизлигини таъминлаш режаси» асосида махсус тактик ўқув машғулотлари бошланди. Бу ҳақда вилоят ИИБ матбуот хизматига таяниб «Дарё» мухбири Азизжон Эрматов хабар бермоқда.
Машқларга вилоят Давлат хавфсизлик хизмати, Божхона ва Фавқулодда вазиятлар бошқармалари, Миллий гвардия, ҳарбий қисмлар, ИИБ ва ҳамкорликдаги хизматлар тезкор гуруҳлари, туман ҳокимлиги, тумандаги барча корхона-ташкилотлар вакиллари жалб этилган.
Ўқув машғулоти сценарийсига кўра, бир гуруҳ қуролланган жиноятчилар давлат чегарасини айланма йўллар орқали кесиб ўтиб, Данғара тумани ҳудудида ноқонуний ҳаракатлар содир этиши, намойишлар уюштириши мумкинлиги ҳақида маълумот олинган.
Вазиятдан келиб чиққан ҳолда тумандаги барча ташкилот ва идоралар ўз ҳудуди қўриқланишини кучайтириши, фуқароларнинг кириб-чиқишига эътиборли бўлиши, бегона шахслар пайдо бўлганда зудлик билан ҳуқуқни муҳофаза қилувчи идораларга хабар бериши керак бўлади.
Ўқув машғулоти фавқулодда вазиятлар юзага келганда ҳамкорлик қилувчи куч тизимларини хабардор қилишни ташкил этиш, тумандаги объектлар хавфсизлигини таъминлаш, куч ва воситаларни бошқаришни режалаштириш, ҳамкор идоралар ҳаракатларини мувофиқлаштириш мақсадида ўтказилмоқда.
Изоҳ (0)