Farg‘ona viloyatining Dang‘ara tumanida O‘zbekiston Qurolli Kuchlari va hamkor idoralarning 2018–2019-o‘quv yili uchun mo‘ljallangan dasturiga ko‘ra “Hudud xavfsizligini ta’minlash rejasi” asosida maxsus taktik o‘quv mashg‘ulotlari boshlandi. Bu haqda viloyat IIB matbuot xizmatiga tayanib “Daryo” muxbiri Azizjon Ermatov xabar bermoqda.
Mashqlarga viloyat Davlat xavfsizlik xizmati, Bojxona va Favqulodda vaziyatlar boshqarmalari, Milliy gvardiya, harbiy qismlar, IIB va hamkorlikdagi xizmatlar tezkor guruhlari, tuman hokimligi, tumandagi barcha korxona-tashkilotlar vakillari jalb etilgan.
O‘quv mashg‘uloti ssenariysiga ko‘ra, bir guruh qurollangan jinoyatchilar davlat chegarasini aylanma yo‘llar orqali kesib o‘tib, Dang‘ara tumani hududida noqonuniy harakatlar sodir etishi, namoyishlar uyushtirishi mumkinligi haqida ma’lumot olingan.
Vaziyatdan kelib chiqqan holda tumandagi barcha tashkilot va idoralar o‘z hududi qo‘riqlanishini kuchaytirishi, fuqarolarning kirib-chiqishiga e’tiborli bo‘lishi, begona shaxslar paydo bo‘lganda zudlik bilan huquqni muhofaza qiluvchi idoralarga xabar berishi kerak bo‘ladi.
O‘quv mashg‘uloti favqulodda vaziyatlar yuzaga kelganda hamkorlik qiluvchi kuch tizimlarini xabardor qilishni tashkil etish, tumandagi obyektlar xavfsizligini ta’minlash, kuch va vositalarni boshqarishni rejalashtirish, hamkor idoralar harakatlarini muvofiqlashtirish maqsadida o‘tkazilmoqda.
Izoh (0)