Гулистон шаҳрида 8 декабрь – Ўзбекистон Республикаси Конституцияси қабул қилинган кун муносабати билан «Сирдарё асали» кўргазмаси ўтказилди. Бу ҳақда ЎзА хабар қилди.
Ўзбекистон Республикаси Қишлоқ хўжалиги вазирлиги, «Ўзбекистон асаларичилари» уюшмаси ва Сирдарё вилояти ҳокимлиги ҳамкорлигида ташкил этилган тадбирда асаларичилар томонидан 3 тоннага яқин 10 турдаги асал ва асал маҳсулотлари намойиш этилди.
Кўргазма очилиши муносабати билан ташкил этилган тадбирда мамлакатда амалга оширилаётган кенг кўламли ислоҳотлар барча соҳаларда юксак самаралар бераётгани, хусусан, аҳолини сифатли озиқ-овқат маҳсулотлари билан таъминлашга қаратилаётган эътибор натижасида қишлоқ хўжалиги маҳсулотлари етиштириш ҳажми муттасил ортиб бораётгани таъкидланди.
– Президентимизнинг 2017 йил 16 октябрдаги «Республикамизда асаларичилик тармоғини янада ривожлантириш чора-тадбирлари тўғрисида»ги қарори соҳанинг истиқболдаги устувор вазифаларини белгилаб олишда асалчилар учун ҳам дастуриламал бўлиб хизмат қилмоқда, – дейди Сирдарё вилояти асаларичилик уюшмаси раиси Бекзод Олимов. – Айни пайтда вилоятда 300 га яқин шахсий асаларичилик корхонаси мавжуд бўлиб, улар томонидан йилига 400 тоннага яқин тоза асал етиштирилади. Лекин уларнинг бор-йўғи 70 тасигина уюшмага аъзо, холос. Президентимизнинг ушбу қарорига мувофиқ, уюшмага аъзо бўлганлар имконияти янада ортди. Яъни улар ўзлари етиштирган маҳсулотни уюшма кўмагида экспортга чиқариш, корхона фаолиятини кенгайтириш ва бошқа ҳолатларда қўшимча имкониятларга эга бўлади. Кўргазмада ана шулар ҳақида ҳам маълумот берилди.
Бекзод Олимов уюшмага раислик қилиш билан бирга, 10 йилдан буён асалчиликка ихтисослашган «Ниҳол сеҳри савдо сервис» хусусий корхонасини ҳам бошқаради. Жамоа аъзолари айни пайтда 580 асалари оиласини парвариш қилиб, йилига ўртача 4-5 тоннага яқин асал йиғиб олмоқда. Хусусий корхонада асал, асал муми, болари чанги, асалари сути каби турфа маҳсулотлар ишлаб чиқариш ўзлаштирилган.
Бундан ташқари, корхонада асалари учун қути, мумпарда мосламалари ясаш, зотли асалари тухуми етиштириш ишлари ҳам йўлга қўйилган. Айни пайтда корхонада 10 киши меҳнат қилаётир. Истиқболда жамоа аъзолари асал ва асал маҳсулотларини қайта ишлаш, қадоқлаш цехлари ташкил этиш, экспортни йўлга қўйиш, асалари оиласини кўпайтириб, ҳосилдорликни янада ошириш ва янги иш ўринлари яратишни режалаштирган.
Уч кун давом этган асал байрамида асаларичилар томонидан тақдим этилган 3 тоннага яқин 10 хилдаги асал ҳамда асал муми, болари чанги, асалари сути каби арзон нархлардаги турфа маҳсулотлар харидоргир бўлди.
Изоҳ (0)