Хитойнинг «Шенганд» компанияси Фарғона вилоятида мебел ва пойабзал саноатида фойдаланиладиган желатин маҳсулоти ишлаб чиқарувчи корхона қуришни режалаштирмоқда. Бу ҳақда вилоят ҳокимлиги ахборот хизмати маълумотига таяниб «Дарё» мухбири Азизжон Эрматов хабар берди.
Фарғона вилоят делегацияси Хитойнинг Хубэй провинцияси маъмурий маркази Ухань шаҳрида бўлиб ўтган Халқаро биродар шаҳарлар конференциясида иштирок этди. Конференцияда 130 дан ортиқ давлатнинг 700 дан зиёд шаҳарлари вакиллари қатнашди.
«Ўзаро ҳамкорликни ривожлантириш ва мустаҳкамлаш учун мавжуд имкониятлардан биргаликда фойдаланиш» деб номланган икки кунлик конференция доирасида биродар шаҳарлар учун инвестицион тадбир ва кўргазмалар ўтказилди.
Конференция давомида иштирокчиларни Ўзбекистон билан таништириш мақсадида «Ўзбекистонга хуш келибсиз» деб номланган видеоролик намойиш этилди.
Ухан савдо-саноат палатаси ва ўндан ортиқ компания вакиллари иштирокида Фарғона вилоятининг инвестицион жозибадорлигига бағишланган семинар ҳам ташкил этилди. Унда меҳмонхона ва савдо марказлари қуришга ихтисослашган, туризм хизматларини кўрсатувчи, автомобиль эҳтиёт қисмлари ишлаб чиқарувчи ҳамда экспорт-импортга ихтисослашган компаниялар томонидан Фарғона вилоятига алоҳида қизиқиш билдирилди. Хусусан, «Dossen International Group Hubei branch» компанияси Фарғона шаҳрида меҳмонхона қуришни таклиф қилди. «Hubei Frukt» компанияси Ўзбекистон мева маҳсулотларини экспорт қилиш истагини билдирди.
Фарғона вилоятида айни пайтда Хитой билан ҳамкорликда 36 та қўшма ва 19 та хорижий корхоналар фаолият юритмоқда. Шунингдек, Хитой давлатининг умумий 245 миллион АҚШ долларлик тўғридан-тўғри инвестицияси иштирокида 11 та лойиҳа амалга оширилмоқда.
Изоҳ (0)