Ўзбекистон Қуролли Кучлари давлат музейида Мудофаа вазирлиги Фахрийлар ишлари бўйича Марказий кенгаш аъзоси, моҳир учувчи Александр Харламовнинг 70 йиллик юбилейига бағишланган маънавий-маърифий тадбир бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
Байрам муносабати билан Александр Харламовни қутлаш учун Мудофаа вазирлиги Фахрийлар ишлари бўйича Марказий кенгаши ҳамда «Ветеран» жангчи-фахрийлар ва ногиронлар бирлашмаси раислари сўзга чиқиб, туғилган кун эгасини қутлуғ ёш билан табриклади. Меҳмонлар Александр Харламовнинг ҳаётий тажрибаси, Ўзбекистон Қуролли Кучлари Ҳарбий ҳаво кучлари қўшинларини ривожлантиришга қўшган ҳиссасини алоҳида қайд этиб ўтди.
Тадбир давомида Қуролли Кучлар марказий ашула ва рақс ансамблининг хонандалари томонидан ижро этилган куй-қўшиқлар эса барча меҳмонларга бирдек манзур бўлди.
Тадбир сўнгида йиғилганлар Қуролли Кучлар давлат музейида Александр Харламовга бағишланган экспозициянинг очилиш маросимида ҳам иштирок этдилар.
Александ Харламов 1948 йили Қозоғистоннинг Зеленова туманида туғилган. 1966 йилда Сизран олий ҳарбий авиация билим юртини тамомлаган. 1991—1992 йиллар давомида Тошкентдаги авиация бошқармаси жанговар тайёргарлик бўлими учувчиси — катта инспектор сифатида, 2000—2005 йилларда Ҳарбий ҳаво кучлари бошқармаси бошлиғининг ўринбосари, 2009—2011 йиллар давомида «Чирчиқ авиация таъмирлаш заводи»да синовчи-учувчи сифатида фаолият юритган. 2015 йилдан буён Ҳаво ҳужумидан мудофаа ва Ҳарбий ҳаво кучлари қўшинлари Фахрийлар ишлари бўйича кенгашининг раиси ҳисобланади.
Александр Николаевич 1999—2000 йилларда аксилтеррор операцияларида мураккаб ва масъулиятли вазифаларни бажаргани учун «Дўстлик» ҳамда «Шон-шараф» орденлари билан тақдирланган. У Ўзбекистон вертолёт авиациясининг муваффақиятли қўлланилишида, кўплаб ёш ҳарбий учувчиларни тайёрлашда улкан ишларни амалга оширган. Ҳавода 7400 соатдан ортиқ учгани сабаб «Ҳарбий учувчи-снайпер» номини олган.
Изоҳ (0)