23 ноябрь куни Ўзбекистон давлат санъат галереясида Жанубий Корея замонавий рассомларининг Ўзбекистондаги илк намойиши — «Гўзаллик билан ёнма-ён» кўргазмаси бошланди. Бу ҳақда «Turon 24» хабар бермоқда.
«Кўргазмада абстракт йўналишидаги асарлардан тортиб анъанавий тасвирий санъат намуналарини ҳам кўриш мумкин. Унда Корея ижодкорлари орасидаги энг таниқли 16 нафар рассомнинг ижодий ишлари жамланган. Асарларнинг кўпчилиги мойбўёқ, акварелда ишланган. Оддий воқеликдан ҳам гўзал бир ҳолат ярата олган ижодкорга таҳсин айтиш лозим. Кўргазмада таниқли ўзбек рассомларининг ҳам асарлари бор», — дейди санъатшунос Саодат Рўзиева.
Ўзбекистон ва Корея Республикаси ўртасида дипломатик муносабатлар ўрнатилганининг 27 йиллигига бағишлаб ташкил этилган кўргазмада корейс рассомларининг 80 га яқин асари намойиш этилмоқда.
Кўргазманинг очилиш маросимида санъатшунослар, рассомлар ҳамда Ўзбекистон маданият вазирининг биринчи ўринбосари Озодбек Назарбеков ва Корея Республикасининг Ўзбекистондаги элчиси Квон Ёнг қатнашди.
«Гўзаллик билан ёнма-ён» кўргазмаси 6 декабргача давом этади.
Изоҳ (0)