Ўзбекистон Касаба уюшмалари федерацияси томонидан Халқаро меҳнат ташкилоти ҳамда Олий ва ўрта махсус таълим вазирлиги билан ҳамкорликда Ўзбекистондаги олий таълим муассасалари талабалари ўртасида «Заковат» интеллектуал ўйини доирасида меҳнат ҳуқуқига бағишланган «Талабалар кубоги» турнири ташкил этилди.
Мусобақа ташкилотчиларининг «Дарё»га маълум қилишича, тадбирдан кўзланган асосий мақсад — талаба ёшларнинг мантиқий фикрлаш доирасини ҳамда дунёқарашини кенгайтириш, улар орасида меҳнат ҳуқуқига оид билимларни тарғиб қилишда интерактив усуллардан фойдаланиш, турли вилоят талабалари ўртасида дўстона муҳитни шакллантиришдир.
Турнирнинг минтақавий саралаш босқичлари тўртта ҳудудда бўлиб ўтди. Самарқанд (29 октябрь), Бухоро (31 октябрь), Фарғона (2 ноябрь) ва Тошкент (4 ноябрь) шаҳарларида ташкил этилган ўйинларда Ўзбекистондаги 80 та ОТМлардан 640 нафар иштирокчи қатнашди.
Халқаро талабалар куни арафасида саралаш босқичларидан муваффақиятли ўтган 15 та ОТМ жамоаси иштирокида турнирнинг республика босқичи ўтказилди. Тадбирда Халқаро меҳнат ташкилотининг Учинчи томон мониторинги лойиҳаси вакиллари Ёнас Аструп ва Оксана Липкану, Олий ва ўрта махсус таълими вазирининг биринчи ўринбосари Одил Абдураҳмонов ва Ўзбекистон Касаба уюшмалари федерацияси раиси ўринбосари Ёрқин Файзуллаевлар иштирок этди ва талабаларни ўзига хос интеллектуал байрам билан қутлади.
Жамоаларга 45 та мантиқий саволлар берилди ва энг кўп очко тўплаган жамоалар республика босқичида ғолиб бўлишди:- 1-ўрин: Тошкент педиатрия тиббиёт институти;
- 2-ўрин: Жаҳон иқтисодиёти ва дипломатия университети;
- 3-ўрин: Тошкент тиббиёт академияси.
Тадбирдан лавҳалар
Изоҳ (0)