O‘zbekiston Kasaba uyushmalari federatsiyasi tomonidan Xalqaro mehnat tashkiloti hamda Oliy va o‘rta maxsus ta’lim vazirligi bilan hamkorlikda O‘zbekistondagi oliy ta’lim muassasalari talabalari o‘rtasida “Zakovat” intellektual o‘yini doirasida mehnat huquqiga bag‘ishlangan “Talabalar kubogi” turniri tashkil etildi.
Musobaqa tashkilotchilarining “Daryo”ga ma’lum qilishicha, tadbirdan ko‘zlangan asosiy maqsad — talaba yoshlarning mantiqiy fikrlash doirasini hamda dunyoqarashini kengaytirish, ular orasida mehnat huquqiga oid bilimlarni targ‘ib qilishda interaktiv usullardan foydalanish, turli viloyat talabalari o‘rtasida do‘stona muhitni shakllantirishdir.
Turnirning mintaqaviy saralash bosqichlari to‘rtta hududda bo‘lib o‘tdi. Samarqand (29-oktabr), Buxoro (31-oktabr), Farg‘ona (2-noyabr) va Toshkent (4-noyabr) shaharlarida tashkil etilgan o‘yinlarda O‘zbekistondagi 80 ta OTMlardan 640 nafar ishtirokchi qatnashdi.
Xalqaro talabalar kuni arafasida saralash bosqichlaridan muvaffaqiyatli o‘tgan 15 ta OTM jamoasi ishtirokida turnirning respublika bosqichi o‘tkazildi. Tadbirda Xalqaro mehnat tashkilotining Uchinchi tomon monitoringi loyihasi vakillari Yonas Astrup va Oksana Lipkanu, Oliy va o‘rta maxsus ta’limi vazirining birinchi o‘rinbosari Odil Abdurahmonov va O‘zbekiston Kasaba uyushmalari federatsiyasi raisi o‘rinbosari Yorqin Fayzullayevlar ishtirok etdi va talabalarni o‘ziga xos intellektual bayram bilan qutladi.
Jamoalarga 45 ta mantiqiy savollar berildi va eng ko‘p ochko to‘plagan jamoalar respublika bosqichida g‘olib bo‘lishdi:- 1-o‘rin: Toshkent pediatriya tibbiyot instituti;
- 2-o‘rin: Jahon iqtisodiyoti va diplomatiya universiteti;
- 3-o‘rin: Toshkent tibbiyot akademiyasi.
Tadbirdan lavhalar
Izoh (0)