Ўзбекистон БМТнинг Қрим ҳақидаги резолюцияси лойиҳасига қарши овоз берди

БМТ Бош ассамблеясининг ижтимоий, маданий ва гуманитар муаммоларга масъул бўлган учинчи қўмитаси Қримда инсон ҳуқуқларининг бузилишига оид резолюция лойиҳасини қабул қилган. Ўзбекистон бу резолюцияга қарши овоз берди. Бу ҳақда UNIAN ахборот агентлигига таяниб, «Turon 24» хабар берди.

Резолюцияни 77 мамлакат, хусусан, Украина, Европа Иттифоқи, Канада, Туркия ва АҚШ қўллаб-қувватлаган. 25 давлат резолюция қабул қилинишига қарши чиққан. Улар орасида Россия, Ўзбекистон, Қозоғистон, Арманистон, Эрон, Ҳиндистон, Хитой, КХДР, Сербия, Сурия ва бошқа давлатлар бор. 77 та давлат (асосан, Лотин Америкаси ва Африка давлатлари) бетараф қолган.

Украина ташаббуси билан қабул қилинаётган ҳужжатда Қрим ва Севастополда инсон ҳуқуқлари мунтазам бузилаётганлиги таъкидланган.

Резолюция БМТ бош ассамблеясининг навбатдаги сессиясида қабул қилиниши кутилмоқда.

Ҳужжат 2016 ва 2017 йилларда ҳам қабул қилинган, Ўзбекистон аввал ҳам уни қўллаб-қувватламаган.

Бу йилги резолюция матнида жиддий ўзгаришлар бўлиб, унда Россияни инсон ҳукуқлари борасидаги вазиятни ўнглаш учун берилган тавсияларга амал қилишга чақирилган.