ИИВ жамоатчилик ва ОАВ билан алоқалар бошқармаси электрон нашрларда тарқалган Тошкент вилоятидаги манзил-колонияда сақланувчи маҳкумларга шароит яратилмагани, уларнинг ҳуқуқлари бузилаётгани ҳақидаги хабарларни рад этди.
Бошқармага кўра, муассасадаги ювиниш ва хожатхоналар замонавий техника билан жиҳозланган, эски ҳожатхоналар ва юз-қўл ювиш ускуналари эса анчадан буён ишлатилмайди. Овқат тайёрлаш ва танаввул қилиш учун эркак маҳбусларга алоҳида бинода керакли буюм ва асбоб-ускуналар билан жиҳозланган ошхона ишлаб турибди.
Маҳкумлар уяли телефондан эркин фойдаланади. Уларнинг яқинлари ва бошқа шахслар билан учрашишларида чекловлар мавжуд эмас.
Шунингдек, жазони ўташ муассасалари фаолияти ва уларда маҳбуслар ҳуқуқларининг таъминланиши юзасидан идоравий ва прокурорлик назорати доимий равишда амалга оширилади.
2018 йил давомида Жазони ижро этиш бош бошқармасига Тошкент вилоятида жойлашган манзил-колониядан 275 та мурожаат келиб тушган бўлиб, улар асосан авф масалалари ва бошқа колонияларга ўтказиш юзасидан мурожаатлардан иборат. Маҳкумлар ёки уларнинг қариндошларидан шикоятлар келиб тушмаган.
Изоҳ (0)