Ўзбекистон қушларни қўриқлаш жамияти томонидан октябрь-ноябрь ойларида ўтказилган тадқиқотлар натижасида Ўзбекистон ҳудудида йўқолиб кетиш хавфи ўта юқори бўлган торғоқ қушининг бутун дунёдаги сонининг чорак қисми қайд этилди, деб ёзади «Nuz.uz».
Сўнгги йилларда ушбу қушлар сони шимолий Қозоғистонда уларнинг ин қуриб болалаш жойларида икки марта, Европада эса 80 фоизга камайди. Бунга қишлоқ хўжалигида кузатилган ҳамда Қозоғистон ва Россиядаги даштларнинг йўқолишига олиб келган ўзгаришлар, шунингдек, яйловлар деградацияси ва овчилик сабабчи бўлди.
Октябрь ойида «Торғоқнинг ёрқин келажаги учун» дастури доирасидаги экспедиция иштирокчилари Қашқадарё вилоятидаги Толимаржон сув омборида 4060 дона торғоқ қушларини қайд этди. Бутун дунёда қирилиб бораётган ушбу турнинг умумий сони 6—8 мингта эканлигини ҳисобга олганда, ушбу топилма алоҳида қимматга эгадир.
Толимаржон торғоқ қуши Қозоғистондан Ҳиндистонга кузги миграцияси чоғида тўхтаб ўтадиган ягона жойдир. Халқаро табиатни қўриқлаш иттифоқи Толимаржон ҳудудини табиатни муҳофаза қилиш саъй-ҳаракатларини ўз вақтида амалга ошириш зарур бўлган, биохилма-хилликнинг энг асосий ҳудудларидан бири сифатида белгилади.
Қушларни ҳимоя қилиш жамияти Толимаржон сув омбори ҳудудида ов қилиш вақтинча тақиқланган қўриқхона яратиш масаласини кўриб чиқишни таклиф қилмоқда.
Изоҳ (0)