Ўзбекистон Миллий ахборот агентлиги (ЎзА) Ички ишлар вазирлиги Жамоатчилик ва оммавий ахборот воситалари билан алоқалар бошқармаси маълумотларига асосланиб, ис газидан заҳарланиш ва газ чақнаши билан боғлиқ айрим ҳолатлар ҳақида ахборот берди.
Тошкентнинг Миробод туманида уйда газ плитаси мунтазам ёқиб қўйилгани натижасида 1992 йилда туғилган Г.Ж. ис газидан заҳарланган. Аёлга касалхонада тиббий ёрдам кўрсатилган. Қўйлиқ 1-даҳаси 6-уйдаги хонадонлардан бирида содир бўлган ушбу воқеа юзасидан ички ишлар органлари ходимлари суриштирув ишларини олиб бормоқда.
Тошкент вилоятининг Пискент тумани «Чўлақўрғон» маҳалласи Саодат кўчасидаги уйлардан бирида ҳам ис газидан заҳарланиш қайд этилди. Бувисининг уйига меҳмонга келган 2000 йилда туғилган И.С. ва 2002 йилда туғилган С.С. печга ёқилган кўмирдан сизиб чиққан ис газидан заҳарланиб, касалхонага ётқизилган.
Сирдарё тумани «Хазина» маҳалла фуқаролар йиғинида яшовчи Б.У. уйида ҳаммом чироғини ёқиши натижасида хонага тўпланган газ ва ҳаво аралашмасидан чақнаш содир бўлган. Фуқаро куйиш жароҳатлари билан касалхонага ётқизилган.
Қашқадарё вилоятининг Шаҳрисабз туманида ҳам шунга ўхшаш ҳолат рўй берган. «Ўртақўрғон» маҳалла фуқаролар йиғинида яшовчи, 1994 йилда туғилган И.Н. ошхонасида гугурт ёққан вақтида шу ерда турган газ баллонидан сизиб чиққан газ ва ҳаво аралашмасидан чақнаш содир бўлган. Оқибатда аёл ва унинг 4 ёшли қизи куйиш жароҳатлари билан касалхонага ётқизилган.
«Ушбу ҳолатлар юзасидан ҳам суриштирув ишлари олиб борилмоқда», — дейилади хабарда, бироқ унда бу воқеалар айнан қачон бўлганига аниқлик киритилмаган. Бундан ташқари, ЎзА хабарида қайд этилишича, «ўтган ҳафтада 220 та ёнғин қайд этилган, уларда икки фуқаро ҳалок бўлган», лекин санага аниқлик киритилмаган.
Изоҳ (0)