Ёшлар Иттифоқи Марказий Кенгаши Тошкент ахборот технологиялари университетининг баъзи талабалари, бошланғич ташкилот аъзоларининг «Troll.uz» интернет-лойиҳаси саҳифаларига қарши «спам» эълон қилиш акциясини ўтказиши бўйича ҳеч қандай топшириқ бермаган ва уларни бу хатти-ҳаракатларга ундамаган. Бу ҳақда Иттифоқ раиси биринчи ўринбосари Алишер Саъдуллаев Facebook’даги саҳифасида маълум қилди.
Аввалроқ ТАТУнинг баъзи талабалари «Troll.uz» лойиҳаси асосчиси Умид Ғафуровга туҳмат қилгани, шунингдек, унинг Telegram-каналини спам деб эълон қилиб, ёпиб юбориш мақсадини билдиргани ҳақида хабар берилган эди. Кейинроқ томонлар ўзаро учрашиб, зиддиятни ҳал қилган, талабалар университет ректори гувоҳлигида Умид Ғафуровдан узр сўраган эди.
Алишер Саъдуллаевнинг Facebook’даги саҳифасида эълон қилинган баёнотга кўра, «Ёшлар Иттифоқи талабалар ва фаол ёшларнинг ташаббусларини қўллаб-қувватлайди, аммо улар бошқа ёшлар, хусусан, бу вазиятда, ёш блогернинг фаолияти ва ҳуқуқларини чеклашига қаратилган тақдирда, бундай ишларни ёқламайди».
Ёшлар Иттифоқи ижтимоий тармоқлардаги конструктив блогерлар саҳифалари ва бошқа оммавий ахборот воситалардаги танқидий ва таҳлилий материалларни мунтазам кузатиб, улардан ташкилот фаолиятини яхшилаш мақсадида фойдаланади. «Troll.uz» каби лойиҳаларни Ёшлар Иттифоқи хавф деб қайд этган эмас. Аксинча Ёшлар Иттифоқи жамиятдаги барча ёшлар фикрларини тинглаш ва уларни қўллаб-қувватлаш йўлида хизмат қилади. Умид Ғафуров ҳақида тарқалган маълумотларни ташкилот ҳам қўллаб-қувватламайди ва Умид Ғафуровнинг келажакдаги фаолиятига омад тилайди.
«Ёшлар Иттифоқининг қуйи тизим вакилларидан ‘ура-ура!’ тадбирлардан воз кечиш ва ташкилотнинг ўз олдига қўйган мақсадлари атрофида бирлашиш сўралади», — дейилади Иттифоқ раиси биринчи ўринбосари Алишер Саъдуллаевнинг Facebook’даги саҳифасида эълон қилинган баёнотда.
Изоҳ (0)