2018 йилнинг ўтган даври мобайнида Қашқадарёда 122 нафар оғир ижтимоий вазиятга тушиб қолган хотин-қизларга янги уй-жойлар берилган бўлса, 106 нафарига мўлжалланган янги уй-жойларнинг бошланғич бадал тўлови тўлаб берилган. Бу ҳақда Turon 24 хабар берди.
Конференцияда айтилишича, вилоят яраштирув комиссиясининг саъй-ҳаракати билан жорий йилнинг 9 ойи мобайнида 3 520 та оиланинг ярашишига эришилиб, 5000 га яқин болаларнинг ярим етим бўлиб қолишининг олди олинган. Ажримлар сони эса ўтган йилгига нисбатан 313 та га камайиб, 1 164 тани ташкил этган.
«Яраштирув комиссия хулосасига кўра, кўпгина оилаларнинг биргаликда аҳил яшаб кетишига учинчи томоннинг аралашуви салбий таъсир кўрсатаётгани аниқланди», - дейди вилоят яраштирув комиссияси раиси Абдусалим Шовриқов. Оиладаги ўзаро келишмовчиликларда баъзан қайнона-қайнота, баъзан эса оила аъзоларининг аралашуви сабаб бўлиб қолаётгани учун ҳам биз ёш оилаларга имкон қадар тўғри тушунчалар беришга ҳаракат қилдик. Биргина жорий йилнинг ўтган даври мобайнидаги 1 164 та оиланинг ажраб кетиши натижасида қанчадан-қанча болалар етим бўлиб қолаётгани жуда ачинарли.
Тадбирда сўз олган Қонунчилик палатаси депутати Дилфуза Жалилова бугунги кунда оилаларнинг бузилишига сабабчи бўлаётган учинчи томон аралашувини тақиқловчи алоҳида қонун ишлаб чиқилиши давр талабига айланиб бораётгани хусусида тўхталиб ўтди.
250 нафар делегат қатнашган конференцияда, шунингдек, Бош вазир ўринбосари, Ўзбекистон Хотин-қизлар қўмитаси раиси Танзила Норбоева ҳам иштирок этиб, вилоятда аёллар ўртасидаги жиноятчиликнинг олдини олиш, оналик ва болаликни муҳофаза қилиш учун кўпроқ нималарга эътибор қаратиш лозимлиги хусусида фикр билдирди.
Вилоят соғлиқни сақлаш бошқармаси масъулларининг берган маълумотига кўра, оналик ва болаликни муҳофаза қилиш, аҳолининг репродуктив саломатлигини мустаҳкамлаш борасида олиб борилаётган ишлар натижасида вилоятда оналар ва болалар ўлими ўтган йилгига нисбатан икки бараварга камайган.
Изоҳ (0)