Амирсой тоғ-чанғи курорти Ўзбекистонда қурилаётган энг йирик туристик объектлардан биридир, деб ёзади ЎзА.
Лойиҳа мамлакатдаги биринчи тоғли курорт бўлиб, унда мижозларга қулай, хавфсиз ва сифатли, жаҳон талаблари даражасида хизмат кўрсатилади.
Қурилиш ишларига энг илғор ва инновацион технологиялар жалб қилинган курорт лойиҳаси уч босқичда амалга оширилади.
15 декабрда биринчи босқич якунланиб, шу куннинг ўзида Амирсой дам олиш масканининг очилиши режалаштирилган.
Қисқа муддатда қурилаётган курорт ваъда қилинган муддатда қишки мавсумга тайёр бўладими? Қурилиш ишларининг бориши ҳақида навбатдаги видеошарҳда танишасиз.
«Билдирсой. Ўзбекистон табиати нечоғли гўзал ва бетакрор эканини тушуниб олиш учун шу ерга келишнинг ўзи кифоя. Йўл бўйида, бора-боргунча Сизга – баланд тоғлардаги игнабаргли ва мевали дарахтларнинг ўзига хос ноёб, такрорланмас манзараси, мафтункор табиат ҳамроҳлик қилади.
Тоғлар орасидаги тик нишабли, илонизи йўллардан ўтиб, биз Майгашкан тоғининг шимолий томонидамиз. Амирсойга йўлимиз худди шу ердан бошланади. Шубҳасиз, ушбу курорт мамлакатимиздаги энг йирик дам олиш маскани бўлади. Унинг яна қандай ўзига хос жиҳатлари мавжуд? Қулай инфратузилма ва аъло даражадаги хизмат. Лойиҳа муаллифининг жавоби шундай бўлди. Ундай бўлса нархлар ҳам осмон қадар бўлар экан-да, дейишга шошилманг. Дам олиш маскани – аҳолининг барча қатлами учун бирдек мўлжаллангани учун нархлар ҳам ҳамёнбоп бўлади.
Кўзланган манзилга эсон-омон етиб бориш учун автоуловимизни тоғ йўлида синовдан ўтказилганига алиштирдик. Ишлар қизғин. Йўл-қурилиш ва бошқа юк машиналар тоғ чўққиси томон техника ва бошқа керакли материалларини ташишмоқда. Ҳайдовчилари имкон қадар эҳтиётлик билан бор маҳоратларини ишга солган ҳолда ҳаракатланишмоқда. Чунки улар ҳаракатланаётган йўлларни аслида йўл деб ҳам бўлмайди», — дейилади хабарда.
«Ушбу курорт минтақадаги рақобатчиларидан нимаси билан фарқланади? Биринчидан, Биз курортга энг сўнги замонавий технологияларни жалб қилганмиз. Қолаверса, қурилиш ишлари ҳам барча хавфсизлик қоидаларига мос равишда олиб боримоқда. Албатта, ушбу дам олиш маскани европа талаблари даражасидаги курортлардан бири бўлади. Иккинчидан, жойлашув. Амирсой Тошкент шахри, шу билан бирга аэропортга яқин ҳудудда жойлашган. Учинчидан, энг катта ютуғимиз бу – чанғи учишга жуда мос келувчи қор қатламидир», – дейди «Амирсой» тоғ курорти директори Хосе Антонио Карнисер.
Юқори баландликдан – дрон орқали олинган тасвир орқалигина кенг кўламда олиб борилаётган қурилиш ишларини яққол акс эттириш мумкин. Умумий ҳисобда узунлиги 3 километрдан ортиқ 2 та осма дор йўли ва жами 10 километрли турли мураккабликдаги 8 та тоғ-чанғи трассасининг қурилиш-монтаж ишлари кетмоқда. Хуллас, қиш мавсумида умумий узунлиги 21,3 километр бўлган, турли мураккабликдаги 28 та релефли трасса тоғ чанғи усталари ва сновбордчилар ихтиёрида бўлади. Курортда яратилган инфратузилма ва сервис исталган меҳмонга бирдек манзур бўлиши аниқ.
Бундан ташқари, 15 декабрга қадар 2 та ресторан, тоғ чанғиси ва бошқа воситаларни ижарага бериш пунктларига эга кўп тармоқли марказ қуриб битказилади. Шу кунга қадар лойиҳанинг энг мураккаб қисми ҳисобланган – тоғ бўйлаб ҳаракатланувчи кириш ва дор йўлларига олиб борадиган технологик йўлакларни қуриш ишлари якунланган.
Лекин барча ишлар ҳам қурувчилар хоҳлагандек силлиқ кетаяпти, деб бўлмайди. Чунки курортга олиб борувчи магистрал йўл қурилиши ҳали охирига етказилмаган. Мавжуд йўл эса ёғин-сочин кунларда лойқа бўлиб, автомобиль юришига имкон бермайди. Йўл қуриш вазифаси ўтган йилнинг 14 сентябрь куни Автомобиль йўллари Давлат қўмитаси зиммасига юклатилган эди. Бир ярим ойдан сўнг дам олиш маскани очилиши керак, суратга олаётган кунимиздаги ҳолат бўйича автомобиль йўлининг учдан бир қисми ўтказилган эди.
Ҳозирча, кўприк қурилиши охирига етмагани боис, уддабурон австрияликлар, азбаройи ишларини тезлаштиришлари учун кўриб турганингиз – улкан чаналарда ўз юкларини юқорига тортиб олишмоқда.
Дор йўли ўз вақтида ишга тушиши учун тоғли ҳудудга янги электр узатиш минораларини ўрнатиш орқали электр таъминот масаласини ҳал этиш керак. Мазкур вазифа ҳукумат топшириғи билан «Ўзбекэнерго» ДАКга юклатилган эди.
«25 октябрь яъни биз тасвирга олган кунда режадаги 26 та электр узатиш минораларидан фақатгина 11таси қурилган эди. Сўнги маълумотларга кўра, бу борадаги ишлар жадаллаштирилгани боис курортда яна 9 та минора қад ростлаган.
Афсуски, об-ҳаво инжиқлиги ҳамда вақтнинг тиғизлиги билан боғлиқ муаммоларни ҳал этишга баъзан инсон қўли ожизлик қилади. Энг йирик туристик объект лойиҳасини белгиланган муддатда ишга тушиши эса – мамлакат ижобий имижига дахлдор масала. Шунинг учун ҳам Бош прокуратура томонидан тегишли давлат идоралари вакилларидан иборат штаб тузиладиган бўлди. Бу эса қурилиш жараёнининг ўз вақтида боришини назорат қилиш, юзага келган масалаларни тезкорлик билан ҳал этиш провардида Амирсой дам олиш маскани ўз вақтида ишга тушишига хизмат қилади. Курорт раҳбарияти ҳам ишлар жадаллашиб, 15 декабрь санасида дор йўли ва чанғи трассалари меҳмонлар ихтиёрида бўлишига умид қилмоқда», — дейилади хабарда.
Изоҳ (0)