Ўзбекистон Мудофаа вазирлиги, Ўзбекистон ёшлар иттифоқи Марказий кенгаши ҳамда Ўзбекистон банклар Ассоциацияси 2018 йил 16 октябр куни «Муддатли ҳарбий хизматчилар билан тадбиркорлик фаолиятини ташкил қилиш учун кредитлар олиш ҳамда ҳужжатларни расмийлаштириш тартибини тушунтиришга қаратилган амалий машғулотлар ўтказиш тўғрисида»ги қўшма қарорни имзолади. Бу ҳақда Мудофаа вазирлиги матубот хизмати «Дарё»га маълум қилди.
Ушбу қарор Вазирлир Маҳкамасининг 2018 йил 6 июндаги «Ўзбекистон Республикаси Мудофаа вазирлиги ҳарбий хизматчиларини ижтимоий қўллаб-қувватлашга доир қўшимча чора-тадбирлар тўғрисида»ги қарорининг ижроси йўлида қабул қилинди.
Қарорга мувофиқ Мудофаа вазирлиги, Молия вазирлиги ва Ўзбекистон ёшлар иттифоқига «Ўзсаноатқурилишбанк» ҳамда «Халқ банки» билан ҳамкорликда камида олти ой хизмат қилган муддатли ҳарбий хизматчилар ўртасида тадбиркорлик фаолияти учун ҳужжатларни расмийлаштириш ва кредитлар бериш тартибини тушунтириш бўйича семинарлар, давра суҳбатлари, конференциялар ва амалий машғулотларни ўтказиш, ўтказилган тадбирлар якунлари бўйича муддатли ҳарбий хизматни ўташда сафдошларига ўрнак бўлган ҳарбий хизматчиларга тадбиркорликни ривожлантириш учун имтиёзли кредитларни расмийлаштириш имконини берувчи тегишли сертификатлар бериш тартиби белгилаб берилди.
Муддатли ҳарбий хизматчиларга тадбиркорлик фаолияти бўйича имтиёзли кредитларни расмийлаштириш учун сертификатлар бериш мезонига кўра, кредитлар олиш, ҳужжатларни расмийлаштириш тартиблари бўйича семинарлар, давра суҳбатлари, конференциялар ва амалий машғулотлар курсларининг тугаши билан муддатли ҳарбий хизматчиларнинг орттирган билим даражасини аниқлаш, улар орасидан энг фаол ва билимлиларини саралаш мақсадида имтиҳон синови ўтказилади.
Имтиҳон икки босқичда — тест ва иншо кўринишида бўлади.
Жойлардаги Акциядорлик тижорат«Ўзсаноатқурилишбанк» ва АТ «Халқ банки» томонидан ўтказилган тест синови ва иншо бўйича юқори балл (12 баллдан юқори) тўплаган муддатли ҳарбий хизматчилар билан ўтказиладиган якуний суҳбатдан сўнг, тадбиркорлик фаолияти бўйича имтиёзли кредитларни расмийлаштиришга сертификатлар бериш учун ҳарбий қисм командирига тақдимномалар киритилади.
Тақдимномалар ҳарбий қисмлардан Мудофаа вазирлигига юборилади. «Мудофаа вазирлиги қўшинларидаги муддатли ҳарбий хизматчиларга тадбиркорлик фаолияти бўйича имтиёзли кредитлар учун сертификатларни бериш масаласини кўриб чиқиш» комиссияси томонидан намуна бўлган муддатли ҳарбий хизматчиларга имтиёзли кредитларга сертификатлар бериш учун ҳарбий қисм командирига киритилган тақдимномалар ўрганиб чиқилади. Комиссия томонидан тегишли қарор қабул қилинади ва баённома нусхаларини ҳарбий қисм қўмондонликларига, Ўзбекистон ёшлар иттифоқининг ҳудудий кенгашлари ва Ўзбекистон банклари Ассоциациясига юборилади.
Мудофаа вазирлигида тегишли мутахассислар билан ҳамкорликда муддатли ҳарбий хизматчиларга мазкур қўшма қарор мазмунини тушунтириш ва тадбиркорлик фаолиятини амалга ошириш бўйича машғулотлар ўтказилиши бошланди.
Изоҳ (0)