Алишер Навоий номли кино саройида «Ўзбеккино» МА томонидан суратга олинган 10 фильмнинг илк тизерлари премьераси бўлиб ўтди. «Ўзбеккино» тарихида илк маротада бўлиб ўтган мазкур тақдимотда «Дарё» мухбири Феруз Муҳаммад ҳам иштирок этди.
Тақдимотда сўзга чиққан «Ўзбеккино» МА раҳбарининг биринчи ўринбосари Шуҳрат Ризаевнинг маълумотларига қараганда, ҳиндлар билан ҳамкорлик масаласи энг аввало Ўзбекистоннинг Ҳиндистондаги элчиси Фарҳод Арзиевнинг ташаббуси бўлган.
Ҳиндлар билан ҳамкорликда суратга олинган «Шод-у хуррамликда» деб номланган фильмда бош ролни ўйнаган Дев Адҳикари айни вақтда фильм бош продюсери ҳам ҳисобланади.
Шуҳрат Ризаевнинг маълумотларига қараганда, Дев Адҳикари Ҳиндистоннинг Бенгалия қисмида ниҳоятда машҳур актёрдир. Фильм Бенгал тилида яратилган бўлиб, фильмнинг Ҳиндистондаги эпизодлари Калькуттада суратга олинган.
Фильмнинг асосий воқеалари Тошкент, Самарқанд, Бухоро шаҳарларида бўлиб ўтади. Фильмда ҳинд актёрларидан ташқари Обид Асомов, Муқаддас Холиқова ҳамда Дилноза Кубаева сингари ўзбек акёр ва актрисалари бош ролларни ижро этишган.
Фильмнинг Ўзбекистондаги продюсери режиссёр Зулфиқор Мусоқовнинг «Абдуллажон» фильмидаги Абдуллажон роли билан танилган актёр Шуҳрат Қаюмов ҳисобланади.
«Шод-у хуррамликда» фильмининг Ҳиндистондаги премьераси 12 октябрь куни бўлиб ўтган.
Республика кинопрокат маркази матбуот хизматининг маълумотига қараганда, «Шод-у хуррамликда» фильмининг Ўзбекистондаги премьераси декабрь ойида бўлиб ўтиши режалаштирилган.
Изоҳ (0)