Мудофаа вазирлиги Маънавият ва маърифат маркази қошида ташкил қилинган «Турон» ҳарбий театр-студияси 3-мавсумни Чингиз Айтматовнинг «Сарвқомат дилбарим» қиссаси асосида ишланган спектакл билан очди. Бу ҳақда Мудофаа вазирлиги матбуот хизмати журналист Феруз Муҳаммадга маълум қилди.
Адиб таваллудининг 90 йиллигига муносиб туҳфа бўлган ушбу спектакл премьерасига таниқли ёзувчи ва шоирлар, театр ва кино актёрлари ташриф буюришди.
Бу спектаклнинг театр-студия рэпертуаридан ўрин олган бошқа спектакллардан фарқ қиладиган жиҳати, у бор-йўғи уч персонаж: Илёс (Эркин Бозоров), Асал (Феруза Собитова) ва Ҳадича (Илмира Раҳимжонова) образлари асосига қурилганидир. Асардаги воқеликлар мана шу учта образ атрофида айланади. Инсон қалб оғриқлари, туйғулари ҳаракатлар ва ижро уйғунлигида гўзал тарзда ифодаланган спектакл асар моҳиятини тўлиқ очиб беролгани билан аҳамиятли бўлди.
Шунингдек, спектакл учун ишланган саҳна безаклари, декорациялар, спектакл давомида фойдаланилган қирғиз халқ қўшиқлари ўша давр руҳиятини акс эттира олгани, ўзига хос миллий колоритни очиб бергани билан томошабин эътиборини тортди.
Мазкур спектакл Ўзбекистон Республикаси Президентининг «Буюк адиб ва жамоат арбоби Чингиз Айтматов таваллудининг 90 йиллигини кенг нишонлаш тўғрисида»ги қарори ижроси юзасидан саҳналаштирилиб, халқ эътиборга тортиқ қилинди.
Изоҳ (0)