Ўзбекистон Республикаси Президенти Шавкат Мирзиёевнинг 2017 йил 3 август куни маданият, санъат, маънавият ва адабиёт намоёндалари билан учрашувида кинематография соҳасига, хусусан, буюк аждодлар ва замондошлар ҳаёти ҳақидаги турли жанрларда яратиладиган фильмларни кўпайтиришга алоҳида эътибор қаратилди, деб хабар беради «Ўзбеккино» МА матбуот хизмати.
«Ўзбеккино» Миллий агентлиги буюртмасига асосан юқоридаги мавзуларда қатор бадиий ва ҳужжатли фильмлар ишлаб чиқарилмоқда. Суратга олинган фильмлар тарғиботини амалга ошириш мақсадида жорий йилнинг 31 октябрь куни Алишер Навоий номидаги киносаройда ўтказилган «Хожаи жаҳон Абдулхолиқ Ғиждувоний», «Хасанбой Дўсматов» ҳамда «Ватан ичра мўъжаз Ватан» номли ҳужжатли фильмлар тақдимотлари ўтказилди.
«Хожаи жаҳон Абдулхолиқ Ғиждувоний»
Сценарий муаллифлари: Садриддин Салим Бухорий, Жаъфар Холмўминов
Режиссёр: Александр Гамиров
Оператор: Умид Маликов
«Инсоннинг руҳий-маънавий покланиши, гўзал хулқ, соф эътиқод ҳалол ризқ билан умргузаронликка даъват қиладиган Хожагон тариқати ўрта асрлар мусулмон Шарқи тафаккур тарихида ўчмас из қолдирган. Айниқса, ушбу тариқатнинг асосчиси буюк ватандошимиз Хожаи жаҳон Абдулхолиқ Ғиждувоний асрлар давомида «Хожаи жаҳон» деб улуғланиб келинди.
Мазкур фильмда Хожайи жаҳон Абдулхолиқ Ғиждувонийнинг шогирдлари ҳамда муридларининг хотиралари, китобларидаги ҳаётига оид ёзма манбаларга асосланган ҳолда унинг ҳаёт йўлини тасвирлашга ҳаракат қилинди.
‘Хожаи жаҳон Абдулхолиқ Ғиждувоний’ ҳужжатли фильми бутун умрини инсоннинг маънавий - руҳий камолотига бағишлаган буюк ватандошимиз Абдулхолиқ Ғиждувоний таваллудининг 915 йиллигига бағишланади», — дейилади хабарда.
«Хасанбой Дўсматов» номли 2 қисмли ҳужжатли фильми сценарий муаллифи Дилфуза Турдибоева, режиссёр Раиса Ролдугина, оператор Беҳзод Қодиров томонидан ишланган.
Ушбу фильм ёшлар ўртасида соғлом турмуш тарзи тарғиботи, улар қалбида спорт бўйича Олимпиада ўйинлари чемпионларига ҳавас уйғотиш ҳамда гиёҳвандликка қарши курашиш ғояларини илгари суриш мақсадида яратилди. Фильм Бразилиянинг Рио де-Жанейро шаҳрида бўлиб ўтган XXXI ёзги Олимпиада ўйинларида бокс бўйича зафар қучган Хасанбой Дўсматов мисолида очиб берилган.
«Ватан ичра мўъжаз Ватан»
(Маҳалла – мустаҳкам оила ва соғлом авлод таянчи)
Сценарий муаллифи: Рустам Жабборов
Режиссёр: Бобур Йўлдошев
Оператор: Темур Аюдуллаев
Мусиқа муҳаррири: Жамшид Изомов
«Азал-азалдан ўзбек халқи жамоада, аҳилликда яшаб турмуш кечирган. Халқимизга хос турли миллий қадриятлар, тўй-ҳашам ва бошқа маросимлар айнан жамоавий йўл билан ўтказилган. Бу эзгу қадрият эса «маҳалла» номи билан аталган.
Мазкур фильмда юртимизда самарали йўлга қўйилган маҳалла институти, яъни фуқароларнинг ўзини ўзи бошқариш органи ва унинг жамият ҳаётидаги аҳамияти ҳақида сўз юритилади», — дейилади хабарда.
Изоҳ (0)