27 октябрь куни ижтимоий тармоқ фойдаланувчилари шумшайиб турган, кўринишидан зиёли, раҳбарларга хос қўлида блокнот тутган олти кишининг ариқ сувида донг қотган ҳолати тасвирланган суратни роса муҳокама қилди. «Kun.uz» ушбу ҳолат Тошкент вилояти Оққўрғон тумани, «Абдуносир Ғулом» фермер хўжалиги майдонида юз берганини аниқлади.

Фото: Telegram

«Kun.uz»га етиб келган ахборотга кўра, ариқ сувига оёқ тиққан кишилар Оққўрғон тумани ҳокимининг қишлоқ хўжалик ишлари бўйича ўринбосари — Шерзод Муродов, туман сув хўжалиги бошлиғи — Тоҳир Мирзакаримов, туман қишлоқ хўжалиги бўлими бошлиғи — Шароф Аҳмедов, «Озод» маҳалла фуқаролар йиғини оқсоқоли — Зокир Мусабеков, «Мавлонбой ота» фермер хўжалигини раҳбари — Аброр Мавлонов, «Абдуносир» фермер хўжалиги раҳбари (исми Носир) бўлиб чиқди.

Маълум қилинишича, бош вазир ўринбосари Зоир Мирзаев ғаллага ўз вақтида сув қуймаган масъул ва фермерларни шу кўринишда жазолаган. Туман ҳокими Фарҳод Омонов «Kun.uz» мухбирларига воқеа тафсилотларини айтиб берган.

«Ғалла экиш бўйича тумани ҳокими ўринбосари (Шерзод Муродов — таҳр.) борганда, қилинган ишларнинг барчасини таҳлил қилмоқчи бўлган. Икки нафар фермер хўжаликлари раҳбарлари, ўзининг (қўл остидаги) ходимлари, сув хўжалиги бошлиғи билан биргаликда бўлган. Ғалла экилгандан кейин, сув қуйилиши керак. Лекин, ғалла экилган жойда сув қуйилмаган, ёнидаги ариқда эса сув оқиб ётибди. ‘Мана сув бор-ку! Нега сув қуймайсан?’, деган пайти, сувга ўзи тушиб кетган. ‘Мана — сув! Бу ёққа кел, сен ҳам сувни кўргин’, деб туриб, қолганларни ҳам сувга (нима қилган)...», — дейди у.

Оққўрғон тумани ҳокими Фарҳод Омонов.

Фото: «Kun.uz»

Омоновнинг айтишича, туман ҳокими ўринбосари Шерзод Муродов ушбу текширувга раҳбарлик қилган ва «ғаллага бўлган талабини кўрсатмоқчи бўлган».

«Ғаллани биринчигача (1 ноябрь — таҳр.) экиб бўлишимиз керак. Бу пайтда суғориб, чиқариб юбориш керак. Шунга, талаб сал кучайтирилган. Нотўғри қилган. Шунинг учун, биз буни муҳокама қилдик. Ўзидан тушунтириш хатини олдик. Бундан ташқари, энг кам иш ҳақининг 5 бараварида маъмурий жазога тортилди. Бу воқеа ўтган куни, тушдан сўнг бўлганди», — дейди туман ҳокими Фарҳод Омонов.

Бундан ташқари, ҳоким текширув пайти «республикадан ҳеч ким бўлмагани»ни тасдиқлади. Бу гапнинг тескариси, яъни ўша куни Ўзбекистон бош вазири ўринбосари Зоир Мирзаев Оққўрғонда, сувга ботган олтовлондан сал нарида бўлгани ҳақида туман ҳокими ўринбосари Шерзод Муродов айтиб берди. Муродовга кўра, воқеа сал бошқача юз берган — яъни у ғаллага сув қуйилмаганини аниқлаган ва жаҳл устида оёқ кийими билан сувга тушган.

«Мана, сув бор-ку, деб, жаҳл устида сувга тушдим... Фермерга сувни кўрсатмоқчи эдим. Мен уларни сувга туширмадим. Уларнинг ўзи тушди. ‘Ариқда сув йўқ’, дейилганди. ‘Мана бор’, деб тушгандим, улар ҳам эргашиб тушди. Сувда кўп турмадик, бир дақиқа атрофида бўлдик», — дея бошқа манзарани кўрсатди Шерзод Муродов.

Сувга «ўзи англаган ҳолда тушган» ҳоким ўринбосари нега атрофдагилар, хусусан ўзининг қўли боғлиқ турганига изоҳ бермади. Унинг айтишича, «туриш — шунақа». Рўпарада эса раҳбарлар бўлган, дея тасдиқлайди у: «Улар бизга терс қараб турганди, 20-30 метр узоқроқда эди. Улар орасида Бош вазир ўринбосари, вилоят прокурори ўринбосари, вилоят ҳокими ўринбосари бўлган. Улар буни кўрмади».

Оққўрғон тумани ҳокими ўринбосари Шерзод Муродов.

Фото: «Kun.uz»

Муродовнинг таъкидлашича, унга нисбатан маъмурий жазо қўлланилган. Буни ҳоким ҳам айтганди, фақат Муродов жазони бошқа иши учун «олгани» ҳақида айтиб қолди. «Энг кам иш ҳақининг 5 баравари миқдоридаги жаримани мен, туман қишлоқ хўжалиги ҳамда туман сув хўжалиги бошлиғи тўлади. Далага сув қуйилмаганди, қишлоқ хўжалиги комплекси раҳбари сифатида назорат қилмагандим. Шунинг учун, маъмурий жазо тайинланди», — дейди у.

Ариқ сувида турганлар ва тарқалиб кетган сурат муаллифи орасидаги масофа узоқ эмас. Шунга қарамай, Муродов у ерда ким турганини эслолмади, билмайди.