Навоий вилоятида карманалик 7-синф ўқувчиси Суҳроб Ҳайдаров томонидан таклиф этилган «Ақлли чиқинди» лойиҳаси жорий этилади. Бу ҳақда «Turon 24» маълум қилди.
Мазкур лойиҳа чиқинди контейнерларини автоматлаштириш жараёнини ўз ичига олади. Бунда контейнерга чиқинди олиб борилганда унинг оғзи автоматик равишда очилади ва қайта ёпилади. Қути қопқоғи чиқинди ҳидининг атрофга таралмаслигини таъминлайди.
«Чиқинди қутисининг ичига газсенсор, яъни тутун сезувчи мослама ўрнатилади, — деди лойиҳа муаллифи С.Ҳайдаров. — Агар қутига чала ёнган сигарет ёки бирор бошқа маҳсулот қолдиқлари ташланса, мослама ўша заҳоти сув пуркаб, ёнғин келиб чиқишининг олдини олади».
Мазкур лойиҳа тақдимоти 24 октябрь куни «Ёшлар маркази»да ташкил этилган «Ҳоким ва ёшлар учрашуви»да бўлиб ўтди. Вилоят ҳокими «Ақлли чиқинди» лойиҳасини маъқуллади ва уни амалга ошириш ҳақида топшириқ берди.
Тадбир давомида «Ёш олимлар клуби» аъзоларининг янги инновацион ғоялари тақдимоти ўтказилди. Ҳаваскор ихтирочилар умумий қиймати 15 миллион сўм миқдорида пул мукофоти билан тақдирланишди.
—Жорий йили Мексикаида ўтказилган халқаро роботехника олимпиадасида иштирок этиб, Марказий Осиё минтақасида биринчи ўринни қўлга киритганим учун менга рағбатлантириш сифатида 5 миллион сўм, шогирдларимга эса 1 миллион сўмдан пул маблағлари ажратилди, — дейди клуб сардори Х.Ҳайдаров. — Ўтган йили вилоят ҳокимлиги ва Ёшлар иттифоқи вилоят кенгаши томонидан клубимизга тақдим этилган 200 миллион сўм эвазига 10 дан ортиқ лойиҳани ишлаб чиқдик. Ҳозир уларни ҳаётга тадбиқ этиш жараёнлари олиб борилмоқда.
Изоҳ (0)