Президент Шавкат Мирзиёев «Ўзбекистон Республикасида кимё саноатини жадал ривожлантириш чора-тадбирлари тўғрисида»ги қарорни имзолади. Ҳужжат матни ЎзА томонидан келтирилди.
Ҳужжат билан 2018—2030 йилларда кимё маҳсулотлари ишлаб чиқаришни 4,5 баробарга ошириш, шунингдек, органик кимё маҳсулотлари улушини 7 фоиздан 54 фоизгача етказиш орқали тармоқни диверсификация қилишни назарда тутувчи «Йўл харитаси» тасдиқланди.
Унга кўра, мавжуд ишлаб чиқаришни модернизация қилиш ва кенгайтириш ҳамда янги қайта ишлаш қувватларини яратишга қаратилган, дастлабки ҳисоб-китобларга кўра 4,8 миллиард АҚШ долларига тенг 29 та инвестициявий лойиҳалар асосан тўғридан-тўғри хорижий инвестицияларни жалб қилган ҳолда амалга оширилади.
Инвестициявий лойиҳаларни амалга оширишни жадаллаштириш мақсадида «Ўзкимёсаноат» га қуйидагиларни таъминлаш топширилди:
«Фарғонаазот» АЖ ва «Қўқон суперфосфат заводи» АЖни хорижий инвесторларга сотиш мақсадида ишлаб чиқаришни модернизация қилиш, кенгайтириш ва диверсификация қилиш бўйича 2018 йил 30 декабрга қадар ушбу жамиятларнинг активларини мустақил баҳолашни якунлаш;
Сирдарё вилояти Янгиер шаҳрида аммиак ва карбамид ишлаб чиқариш заводини қуриш бўйича лойиҳа ҳужжатларини ишлаб чиқиш учун кимё соҳасида тажрибага эга хорижий компания билан истисно тариқасида тўғридан-тўғри музокаралар асосида шартнома тузиш;
Навоий вилоятида фосфорли ўғитлар ишлаб чиқариш комплексини қуриш бўйича 2019 йил август ойига қадар хорижий ташкилот томонидан фосфорли хом ашё майдонини баҳолаш (экспертизадан ўтказиш) асосида инвестициявий лойиҳани амалга ошириш концепциясини ишлаб чиқиш.
«Ўзкимёсаноат» акциядорлик жамиятининг «Самарқандкимё», «Электркимёзавод» ва «Жиззах пластмасса»нинг устав капиталидаги давлат улуши ва «Ўзкимёсаноат» улушини, шунингдек, «Фарғонаазот» инг устав капиталидаги давлат улушини хусусий инвесторларга бозор қийматида сотишқуйидаги таклифларига розилик берилди.
Изоҳ (0)