Navoiy viloyatida karmanalik 7-sinf o‘quvchisi Suhrob Haydarov tomonidan taklif etilgan “Aqlli chiqindi” loyihasi joriy etiladi. Bu haqda “Turon 24” ma’lum qildi.
Mazkur loyiha chiqindi konteynerlarini avtomatlashtirish jarayonini o‘z ichiga oladi. Bunda konteynerga chiqindi olib borilganda uning og‘zi avtomatik ravishda ochiladi va qayta yopiladi. Quti qopqog‘i chiqindi hidining atrofga taralmasligini ta’minlaydi.
“Chiqindi qutisining ichiga gazsensor, ya’ni tutun sezuvchi moslama o‘rnatiladi, — dedi loyiha muallifi S.Haydarov. — Agar qutiga chala yongan sigaret yoki biror boshqa mahsulot qoldiqlari tashlansa, moslama o‘sha zahoti suv purkab, yong‘in kelib chiqishining oldini oladi”.
Mazkur loyiha taqdimoti 24-oktabr kuni “Yoshlar markazi”da tashkil etilgan “Hokim va yoshlar uchrashuvi”da bo‘lib o‘tdi. Viloyat hokimi “Aqlli chiqindi” loyihasini ma’qulladi va uni amalga oshirish haqida topshiriq berdi.
Tadbir davomida “Yosh olimlar klubi” a’zolarining yangi innovatsion g‘oyalari taqdimoti o‘tkazildi. Havaskor ixtirochilar umumiy qiymati 15 million so‘m miqdorida pul mukofoti bilan taqdirlanishdi.
—Joriy yili Meksikaida o‘tkazilgan xalqaro robotexnika olimpiadasida ishtirok etib, Markaziy Osiyo mintaqasida birinchi o‘rinni qo‘lga kiritganim uchun menga rag‘batlantirish sifatida 5 million so‘m, shogirdlarimga esa 1 million so‘mdan pul mablag‘lari ajratildi, — deydi klub sardori X.Haydarov. — O‘tgan yili viloyat hokimligi va Yoshlar ittifoqi viloyat kengashi tomonidan klubimizga taqdim etilgan 200 million so‘m evaziga 10 dan ortiq loyihani ishlab chiqdik. Hozir ularni hayotga tadbiq etish jarayonlari olib borilmoqda.
Izoh (0)