Ҳукумат қарори билан Ўзбекистон Республикаси фуқароларини доимий прописка қилиш ва турган жойи бўйича ҳисобга олиш тартиби тўғрисидаги низом тасдиқланди. Бу ҳақда Адлия вазирлигининг «Ҳуқуқий ахборот» канали хабар берди.
Низом билан фуқароларини Қорақалпоғистон Республикасида ва вилоятларда (Тошкент вилоятидан ташқари) доимий прописка қилиш ва турган жойи бўйича ҳисобга олиш тартиби белгиланди (Тошкент шаҳри ва Тошкент вилояти бўйича алоҳида қарор мавжуд).
Низомга мувофиқ фуқаро вилоятларда доимий пропискага эга бўлиш учун туман (шаҳар) Миграция ва фуқароликни расмийлаштириш бўлимига қуйидаги ҳужжатларни тақдим этади:
- ариза;
- паспорт;
- контракт бўйича ҳарбий хизматчининг шахсий гувоҳномаси ёки Қуролли Кучлари офицерининг шахсий гувоҳномаси (казармалар, корабллар ва кемалардан ташқарида яшайдиган ҳарбий хизматчилар учун);
- уй-жой ҳужжатларининг асл нусхаси (нусхалари олиниб, асли қайтарилади);
- уй-жой мулкдорининг (мулкдорларининг) турар жой майдони бериш тўғрисидаги аризаси;
- никоҳ тузилганлиги ёки болалар туғилганлиги тўғрисидаги гувоҳномалар, шунингдек, васийлик ёки ҳомийликни тасдиқлайдиган ҳужжатлар (нусхалари олиниб, асли қайтарилади);
- прописка учун давлат божи тўланганлиги тўғрисидаги квитансия.
Ҳарбий хизматга мажбур шахсларни пропика қилиш улар мудофаа ишлари бўйича бўлимларда ҳарбий ҳисобга қўйилганларидан кейин амалга оширилади. 16 ёшдан 45 ёшгача бўлган фуқаролар ҳарбий ҳисобга қўйилишлари керак.
Ҳужжатлар уч иш куни мобайнида текширилади ҳамда фуқарога белгиланган тартибда доимий прописка расмийлаштиради.
Фуқарони вилоятда турган жойи бўйича ҳисобга олиш эса уни доимий яшаш жойидан пропискадан чиқармасдан беш кундан бир йил муддатга амалга оширилади.
Вилоятларга беш кундан ортиқ бўлмаган муддатга келган фуқаролар ҳисобга олинмайди.
Шунингдек, фуқаро вилоятда ҳисобга туриш учун келган кунидан бошлаб беш кун муддатда ўзи вақтинча турган жойдаги Миграция ва фуқароликни расмийлаштириш бўлимига қуйидаги ҳужжатларни тақдим этади:
- ариза;
- паспорт;
- контракт бўйича ҳарбий хизматчининг шахсий гувоҳномаси ёки Қуролли Кучлар офицерининг шахсий гувоҳномаси (казармалар, корабллар ва кемалардан ташқарида яшайдиган ҳарбий хизматчилар учун);
- туғилганлик тўғрисида гувоҳнома ва 3,5х4,5 мм ўлчамдаги иккита расм – 16 ёшга тўлмаган шахслар учун;
- уй-жой мулкдорининг (мулкдорларининг) турар жой майдони бериш тўғрисидаги аризаси (розилиги);
- уй-жой ҳужжатларининг асл нусхаси (нусхалари олиниб, асли қайтарилади);
- ҳисобга олинганлик учун давлат божи тўланганлиги тўғрисидаги квитансия.
Шунингдек, «Norma»нинг ёзишича, эндиликда янги қурилаётган уйлардан ҳатто 1 сўм эвазига хонадон сотиб олганларга ҳам пойтахт пропискаси берилади.
«Эндиликда олди-сотдидаги сумма бўйича чеклов олиб ташланди. Олди-сотди баҳоси ҳатто бир сўмга ҳам тенг бўлиши мумкин. Чет эл фуқаролари эса, қайси тоифага мансублигидан қатъи назар, 3 300 ЭКИҲ (материал эълон қилинган санада – 608 миллион 190 минг сўм) тўлашларига тўғри келади.
Шундай қилиб, чет эл фуқаролари ва бошқа вилоятларда рўйхатда турувчи фуқаролиги йўқ шахслар учун «прописка баҳоси» ошди.
2017 йилнинг июль август ойларидан бошлаб жорий этилган тартибга кўра, Ўзбекистон фуқаролари ва республикада яшаётган чет эл фуқаролари янги қурилаётган уйлардан хонадон сотиб олса уларга Тошкент вилояти ва Тошкент шаҳрида доимий прописка тақдим этилаётган эди. Бунинг учун эса уй олди-сотдиси суммаси аниқ белгилаб, чегаралаб қўйилган эди:
- Вилоятларда пропискага эга бўлган Ўзбекистон фуқаролари, чет эл фуқаролари ва фуқаролиги бўлмаган шахслар Тошкент вилояти ва Тошкент шаҳрида янги қурилаётган уйлардан энг кам ойлик иш ҳақининг 2500 баравари миқдори баҳосидаги хонадон сотиб олиб, қўшимча 5 фоиз давлат божи тўлаган тақдирда уларга доимий прописка берилиши белгиланган эди.
- Тошкент вилояти ва Тошкент шаҳрига бошқа давлатдан келган чет эл фуқароси ёки фуқаролиги бўлмаган шахслар эса янги қурилаётган уйлардан энг камида 600 миллион сўмга хонадон харид қилиб, 10 фоиз давлат божи тўлаган тақдирда доимий пропискага эга бўлар эди.
Изоҳ (0)