Ўзбекистоннинг янги таҳрирдаги Солиқ кодекси, эҳтимол, келаси йил апрелда кенг муҳокамага қўйилади. Бу ҳақда Ўзбекистон бош вазири ўринбосари — молия вазири Жамшид Қўчқоров 23 октябрь куни журналистлар билан бўлиб ўтган учрашувда маълум қилди, дея хабар бермоқда Spot.
Июнь ойи охирида Ўзбекистон Президенти Шавкат Мирзиёев «Ўзбекистон Республикасининг солиқ сиёсатини такомиллаштириш концепцияси тўғрисида»ги фармонни имзолаган эди. Ушбу ҳужжатга мувофиқ, 1 январдан янги ставкалар жорий этилади, баъзи тўловлар, хусусан, фуқароларнинг меҳнатга ҳақ тўлаш туридаги даромадларидан Бюджетдан ташқари пенсия жамғармасига ушлаб қолинадиган суғурта бадаллари тўлашни бекор қилинади.
«Фармонда кўрсатилган ставкалар ўзгаришсиз қолади. Ҳеч бир ставка ўзгармайди, бу ҳатто муҳокама ҳам қилинмаяпти», — дея қайд этди Жамшид Қўчқоров.
Президентнинг шу фармони билан ташкил этилган ишчи гуруҳга (бу гуруҳ таркибида Молия вазирлиги ҳам бор) 2018 йил 1 декабрга қадар кенг жамоатчилик муҳокамасини ўтказиш орқали Солиқ кодексининг янги таҳрирдаги лойиҳаси ишлаб чиқиш вазифаси юклатилган эди. Журналистлар билан учрашувда молия вазири лойиҳани белгиланган муддатда тайёрлашга улгурилмаслигини маълум қилди.
«Ростини айтаман, биз Солиқ кодексининг янги таҳририни ишлаб чиқишга улгурмаяпмиз. Иккита вариант бор. Жаҳон банкидаги баъзи консултантлар кодексни қабул қилиб, сўнг 2019 йилда уни бир бор ўзгартиришни таклиф қиляпти. Иккинчи вариант — концепцияда кўрсатилган ставкаларни қабул қилиш, уларнинг бари ишлайди. Солиқ кодексига эса шу ставкалар билан боғлиқ ўзгартишлар киритилади», — деди вазир.
Иккинчи ҳолатда янги Солиқ кодекси, Қўчқоровнинг фикрича, 2019 йил апрелида муҳокамага қўйилиши мумкин. Шунда ҳужжат 2020 йилдан тўлиқ ишлай бошлайди. «Қилаётган ишимизни охирига етказишимиз керак, деган фикрга келдик. Токи кейин ҳам бирор ўзгартириш киритиладиган бўлса, арзимас бўлсин. Жараённи тезлаштириш имкониятлари йўқ», — дея қайд этиб ўтди бош вазир ўринбосари.
Жамшид Қўчқоровнинг маълум қилишича, янги Солиқ кодекси устида Россиянинг собиқ молия вазири Сергей Шаталов ҳам иш олиб бормоқда.
Изоҳ (0)