O‘zbekistonning yangi tahrirdagi Soliq kodeksi, ehtimol, kelasi yil aprelda keng muhokamaga qo‘yiladi. Bu haqda O‘zbekiston bosh vaziri o‘rinbosari — moliya vaziri Jamshid Qo‘chqorov 23-oktabr kuni jurnalistlar bilan bo‘lib o‘tgan uchrashuvda ma’lum qildi, deya xabar bermoqda Spot.
Iyun oyi oxirida O‘zbekiston Prezidenti Shavkat Mirziyoyev “O‘zbekiston Respublikasining soliq siyosatini takomillashtirish konsepsiyasi to‘g‘risida”gi farmonni imzolagan edi. Ushbu hujjatga muvofiq, 1-yanvardan yangi stavkalar joriy etiladi, ba’zi to‘lovlar, xususan, fuqarolarning mehnatga haq to‘lash turidagi daromadlaridan Byudjetdan tashqari pensiya jamg‘armasiga ushlab qolinadigan sug‘urta badallari to‘lashni bekor qilinadi.
“Farmonda ko‘rsatilgan stavkalar o‘zgarishsiz qoladi. Hech bir stavka o‘zgarmaydi, bu hatto muhokama ham qilinmayapti”, — deya qayd etdi Jamshid Qo‘chqorov.
Prezidentning shu farmoni bilan tashkil etilgan ishchi guruhga (bu guruh tarkibida Moliya vazirligi ham bor) 2018 yil 1 dekabrga qadar keng jamoatchilik muhokamasini o‘tkazish orqali Soliq kodeksining yangi tahrirdagi loyihasi ishlab chiqish vazifasi yuklatilgan edi. Jurnalistlar bilan uchrashuvda moliya vaziri loyihani belgilangan muddatda tayyorlashga ulgurilmasligini ma’lum qildi.
“Rostini aytaman, biz Soliq kodeksining yangi tahririni ishlab chiqishga ulgurmayapmiz. Ikkita variant bor. Jahon bankidagi ba’zi konsultantlar kodeksni qabul qilib, so‘ng 2019 yilda uni bir bor o‘zgartirishni taklif qilyapti. Ikkinchi variant — konsepsiyada ko‘rsatilgan stavkalarni qabul qilish, ularning bari ishlaydi. Soliq kodeksiga esa shu stavkalar bilan bog‘liq o‘zgartishlar kiritiladi”, — dedi vazir.
Ikkinchi holatda yangi Soliq kodeksi, Qo‘chqorovning fikricha, 2019-yil aprelida muhokamaga qo‘yilishi mumkin. Shunda hujjat 2020-yildan to‘liq ishlay boshlaydi. “Qilayotgan ishimizni oxiriga yetkazishimiz kerak, degan fikrga keldik. Toki keyin ham biror o‘zgartirish kiritiladigan bo‘lsa, arzimas bo‘lsin. Jarayonni tezlashtirish imkoniyatlari yo‘q”, — deya qayd etib o‘tdi bosh vazir o‘rinbosari.
Jamshid Qo‘chqorovning ma’lum qilishicha, yangi Soliq kodeksi ustida Rossiyaning sobiq moliya vaziri Sergey Shatalov ham ish olib bormoqda.