Адлия вазирлиги Буюк Британия давлат бошқаруви миллий мактаби билан меморандум имзолади

15 октябрь куни Ўзбекистон Адлия вазирлиги Буюк Британия давлат бошкаруви миллий мактаби (Nationал Счоол оф Говермент International) ва Буюк Британиянинг мамлакатдаги элчихонаси билан ҳамкорлик тўғрисидаги меморандум имзолади. Бу ҳақда «Дарё»га вазирлик матбуот хизмати хабар бермоқда.

Томонлар ўртасида имзоланган меморандум Адлия вазирлиги фаолиятини ўрганиш, баҳолаш ва такомиллаштириш, хусусан:

вазирлик фаолиятини ўрганиш, баҳолаш ва такомиллаштириш бўйича ишларни амалга ошириш учун қисқа муддатга халқаро экспертлар гуруҳини жалб қилиш;

вазирлик имкониятларини баҳолаш, уларни кенгайтириш бўйича Ҳаракатлар режасини тайёрлаш;

халқаро экспертларни жалб қилган ҳолда адлия органлари ва муассасалари ходимларининг уларга юклатилган вазифа ва функцияларини амалга оширишдаги салоҳиятини аниқлаш мақсадида улар билан семинар-тренинг, маҳорат дарслари ўтказиш;

адлия соҳасидаги илғор амалиётни ўрганиш учун адлия органлари ва муассасалари ходимларининг Буюк Британияга сафарларини ташкил этиш бўйича қатор чора-тадбирларни амалга оширишни кўзда тутади.