Амалий ташриф билан Сурхондарё вилоятида бўлиб турган Хитой Халқ Республикасининг Сичуань провинцияси делегациялари аъзолари Олтинсой, Денов, Узун ва Сариосиё туманларига ташриф буюрди. Бу ҳақда вилоят ҳокимлиги матбуот хизмати хабар бермоқда.
Хитойлик ишбилармонларнинг Олтинсой туманидаги «East West Surxon», Денов туманидаги «Шашмоҳкашоб», «Раҳмон-Тараққиёт-Омад», «Денов вино-ароқ», Узун туманидаги «Узун Агро Реббит», Сариосиё туманидаги «UzAgroLider», «Райим Алибек Мирзо», «Абдураҳмон-Абдуғаффор-Давр» сингари хўжалик субъектлари фаолияти билан танишуви ҳамкорлик учун муҳим қадам бўлди.
Танишув жараёнида маҳаллий ва хорижлик тадбиркорлар мева-сабзавот ва чорвачилик маҳсулотларини етиштиришнинг иқтисодий технологиялари, маҳсулотни қайта ишлаш ва экспортини такомиллаштириш масалалари юзасидан ўзаро фикр алмашди.
Эслатиб ўтамиз, қишлоқ хўжалиги ва озиқ-овқат соҳаси бўйича 10 дан ортиқ етакчи компаниялар раҳбарларидан иборат Сичуань провинцияси делегацияси аъзоларининг вилоятдаги ташрифи якунида ўзаро манфаатли лойиҳаларни амалга ошириш юзасидан меморандумлар имзолаш кўзда тутилган.
Изоҳ (0)