Шайхонтоҳур туманидаги 6-сонли газ участкаси муҳандиси Н.Ғ. ўз участкасида жойлашган новвойхонада табиий газдан фойдаланишдан аниқланган қоидабузарлик юзасидан ҳужжатларни расмийлаштирмаслик эвазига МИБ инспекторига пора беришга уринган. Бу ҳақда Мажбурий ижро бюроси матбуот хизмати «Дарё»га маълум қилди.
2018 йил 5 октябрь куни соат 19:30 да Шайхонтоҳур туман прокуратураси ва МИБ Шайхонтоҳур туман бўлими ходимлари билан ҳамкорликда МИБ Шайхонтоҳур тумани бўлими тезкор шўъбаси инспектори Ж.Ҳайдаровнинг билдиргисига асосан Ж.Ҳайдаровнинг хизмат хонасида ўтказилган тезкор тадбирда, Шайхонтоҳур туманидаги 6-сонли газ участкаси муҳандиси Н.Ғ. Шайхонтоҳур тумани, Ўзбекистон МФЙ, Тарона кўчасида жойлашган новвойхонада табиий газдан фойдаланишдан аниқланган қоидабузарлик юзасидан ҳужжатларни расмийлаштирмаслик ҳамда унинг хатти-ҳаракатлари устидан «Тошкенцҳаҳаргазтаъминоти» корхонасига тақдимнома бермаслик эвазига МИБ инспектори Ж.Ҳайдаровга пора тариқасида 800 минг сўм берган вақтида ашёвий далиллар билан ушланган.
Мазкур ҳолат юзасидан ҳозирда Н.Ғ.га нисбатан Ўзбекистон Республикаси Жиноят Кодексининг 211-моддаси (пора бериш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)