NASA раҳбари Жим Брайденстайн Ер билан бир қаторда, Қуёш тизимининг бошқа жойларида ҳаёт мавжуд бўлишини истисно қилмади. Бу ҳақда «РИА Новости» хабар берди.
Унинг айтишича, Ердан ташқарида яна бошқа ҳаётни аниқлаш мумкин. Агар Қуёш тизимида бошқа бир ҳаётни аниқлашга муваффақ бўлинса, бу АҚШ ва Россия ҳукуматларининг космик соҳадаги сиёсатига бевосита таъсир кўрсатади.
Унинг сўзларига кўра, ҳаёт учун энг мос келувчи жой сифатида Юпитернинг муз билан қопланган йўлдоши Европани ҳисоблаш мумкин. Муз қатлами остида океан жойлашган бўлиши мумкин. NASA раҳбарининг қайд этишича, Европа кейинги космик тадқиқотларнинг нишони бўлиши мумкин.
Шунингдек, агентлик раҳбари Марсда ҳам ҳаёт мавжуд бўлиш эҳтимолини истисно қилмаган. Унинг таъкидлашича, Марс атмосферасидаги метан концентрациясининг оқими сайёрда қиш ва ёз мавсумларининг ўрин алмашишига идеал тарзда мос келган. Бу ҳозирча Қизил сайёрада ҳаёт мавжудлиги ҳақида гапиришга имкон бермайди, бироқ унинг мавжудлиги эҳтимолини сезиларли даражада оширади.
Изоҳ (0)