Андижонлик тадбиркор ўзи таъсисчи бўлган муассаса тасарруфидаги SE-303 русумли ҳисоблагичнинг рақамларини ўзгартириб, «ноль» ҳолатига келтириб, хуфёна 100 299 124 сўмлик электр энергиясини ишлатган. Бу ҳақда ЎзА хабар берди.
Мажбурий ижро бюроси Андижон вилоят бошқармаси органлари томонидан назорат тадбирлари жараёнида жойларда эгри йўлни танлаган айрим фуқаролар томонидан электр энергияси, табиий газ ва ичимлик суви тармоқларига қонунга хилоф равишда ўзбошимчалик билан уланиб ёки бошқа усуллар орқали давлат мулкини талон-торож қилаётганлик ҳолатлари аниқланмоқда.
Бюронинг Андижон шаҳар бўлими томонидан ўтказилган тадбирда Чинобод кўчасида жойлашган масъулияти чекланган жамиятига қарашли электр ҳисоблагич назорат тартибида ўрганилди. Текшириш давомида, ушбу асбобнинг ички хотирасига ташқи таъсир ўтказилганлиги аниқланган. Шу сабабли, электр ҳисоблагич далолатнома билан жойидан чиқарилиб, экспертизага тақдим этилди.
Маълум бўлишича, тадбиркор С.С. ўзи таъсисчи бўлган муассаса тасарруфидаги SE-303 русумли ҳисоблагичнинг рақамларини ўзгартириб, «нол» ҳолатига келтирган. Ушбу ҳаракати билан у истеъмол қилинган электр миқдорини яшириш орқали, тўловдан бўйин товлаган. Бироқ, текширишлар давомида унинг ғайриқонуний иши туфайли ҳудудий электр тармоқлари корхонаси манфаатларига юқорида кўрсатилган миқдорда зиён етказилишига сабабчи бўлгани аниқланди.
Корхона раҳбари С.С.нинг ҳаракатларида Ўзбекистон Республикаси Жиноят кодексининг тегишли бандида назарда тутилган жиноят аломатлари мавжуд бўлса-да, давлат манфаатларига етказилган зарарни ихтиёрий бартараф этганини инобатга олиб, С.С.га нисбатан Ўзбекистон Республикаси ЖПКнинг тегишли моддасига асосан жиноят ишини қўзғатиш рад этилди.
Тадбиркордан давлат манфаатларига келтирилган зарар тўлалигича ундирилиши билан бирга, қайта улаш учун энг кам ойлик иш ҳақининг 10 баравари миқдорида тўлов ҳам ундирилди.
Изоҳ (0)