Самарқанд вилояти ҳокими вазифасини бажарувчи Эркин Турдимов 9 октябрь куни Жанубий Кореянинг қишлоқ хўжалиги, қурилиш саноати билан шуғулланувчи бир қатор компаниялари раҳбарлари ва тадбиркорларни қабул қилди. Бу ҳақда ЎзА хабар берди.
Учрашувда Ўзбекистон ва Жанубий Корея ўртасидаги ўзаро ишонч ва тенг шерикликка асосланган ҳамкорлик алоқалари кейинги йилларда янада мустаҳкамланиб, янги босқичга кўтарилгани таъкидланди. Бугунги кунда Самарқанд вилоятида ҳам Корея Республикаси ишбилармонлари ва йирик компаниялари билан биргаликда саноат, қишлоқ хўжалиги, ижтимоий-гуманитар соҳаларда кўплаб лойиҳалар ҳаётга татбиқ этилмоқда.
«Бизнинг Ўзбекистонга бу галги ташрифимиздан кўзланган асосий мақсад қишлоқ хўжалиги бўйича ҳамкорлигимизни кенгайтиришдан иборат, — дейди Жанубий Кореядаги Котеc Платформ корпорацияси директори Парк Сун Чул. — Бунинг учун Самарқанд вилоятини танлаб хато қилмаганимизни бугун Қўшработ туманида бўлиб, яна бир бор ҳис қилдик. Ушбу ҳудуддаги унумдор ер ва мавжуд имкониятлардан самарали фойдалансак, икки томон учун ҳам манфаатли бўлади».
Лойиҳага кўра, Котеc Платформ корпорацияси билан биргаликда қўшма корхона ташкил этилади. Бунинг учун Самарқанд вилоятидан 20 минг гектар ер ажратиб берилади. Ушбу майдонда деҳқончилик қилишга Кореядаги 100 дан ортиқ компаниялар жалб этилади. Ҳар бир гектар ер учун ўртача 45 минг доллар миқдорида инвестиция киритилиб, замонавий технологиялар асосида полиз ва мева-сабзавот экинлари етиштириш режалаштирилган. Шунингдек, ҳудудда қишлоқ хўжалик маҳсулотларини қадоқлаш, қайта ишлаш ва сақлаш учун завод ва цехлар, музлатгичли омборлар ташкил этилади.
Изоҳ (0)