Ўзбекистон Матбуот ва ахборот агентлиги ҳузурида таниқли журналист, ношир ва матбаачилардан иборат Жамоатчилик кенгаши тузилди. Бу ҳақда агентлик вакиллари «Дарё»га хабар берди.
Жамоатчилик кенгашининг асосий вазифаси матбуот ва ахборот соҳаларига доир қонунчилик ижросини таъминлашда иштирок этиш, ноширлик, матбаачилик ва ахборот-кутубхона фаолиятини ривожлантиришга кўмаклашишдан иборат.
«Енгил-елпи китоблар, саёз, олди-қочди газета-журналлар нашр этилиши тўхтамаётгани, республиканинг чекка ҳудудларида китоб дўконлари ва кутубхоналар мавжуд эмаслиги, борларида ҳам китоблар етишмаслиги бугунги куннинг долзарб масалаларидандир. Қонун талабларини бузаётган ‘тадбиркоръларга танбеҳ бериш, уларни тартибга чақириш, соҳа фаолияти билан боғлиқ оғриқли нуқталарни ўрганиш, керакли тавсияларни ишлаб чиқишни 14 нафар журналистика, филология, ноширлик, матбаачилик ва кутубхоначилик соҳасининг устунларидан иборат таркибдаги Жамоатчилик кенгаши ўз зиммасига олмоқда», — дейилади хабарда.
Жамоатчилик кенгаши Ўзбекистон Матбуот ва ахборот агентлигининг нодавлат нотижорат ташкилотлари, оммавий ахборот воситалари, ноширлик, матбаа корхоналари, ахборот-кутубхоналар ва фуқаролик жамиятининг бошқа институтлари билан самарали ҳамкорлигини таъминлаш учун «кўприк» вазифасини ҳам ўтайди.
«Жамоатчилик кенгашига журналист ва ёзувчи, филология фанлари доктори Хуршид Дўстмуҳаммад раислик қилади. Кенгашдан, шунингдек, устоз бош муҳаррирлар, Ўзбекистонда хизмат кўрсатган журналистлар Жаббор Раззоқов, Аҳмаджон Мелибоев, тилимиз жонкуяри, куюнчак олим Омонулла Мадаев, журналистлар сайиди Сайди Умиров, таниқли адабиётшунос Баҳодир Каримов, кутубхона фахрийси Абдусалом Умаров ва бошқа таниқли шахслар ҳам ўрин олган», — дейилади хабарда.
Изоҳ (0)