Сирдарё вилояти ИИБ Жиноят қидирув бошқармаси Коррупция ва иқтисодий жиноятларга қарши курашиш бўлими ходимлари томонидан жорий йил 10 сентябрь куни тезкор текширув ишлари олиб борилди. Бу ҳақда ИИВ жамоатчилик ва ОАВ билан алоқалар бошқармаси хабар бермоқда.
Текширувлар давомида «Сирдарёпахтасаноат» ҳудудий бирлашмаси акциядорлик жамияти тугатиш комиссияси раҳбари вазифасини бажарувчи Б.Д. пахта толаси биржа савдолари орқали сотилиши кўрсатилган ҳукумат қарори талабларини қўпол равишда бузгани аниқланди.
2018 йил 27 июль куни биржа савдоларида 260 тонна пахта толасининг қиймати 3 миллиард 993 миллион 770 минг 913,60 сўмни ташкил этганди. Бироқ у 1 август куни «Сарбонтекс» қўшма корхонасига паст нархда, яъни 1,5 миллиард сўмга сотиш ҳақида сохталаштирилган қалбаки шартномани тўғридан-тўғри тузади. Бунинг оқибатида жамият ҳисоб рақамига атиги 1 миллиард 350 миллион сўм тушади. Жамият ва давлат манфаатларига жуда кўп миқдорда, аниқроғи, 2 миллиард 643 миллион 770 минг 913,60 сўмлик моддий зарар етказилади.
Мазкур ҳолат юзасидан Сирдарё вилояти ИИБ ҳузуридаги Тергов бошқармаси томонидан Б.Д.га нисбатан Жиноят кодексининг бир неча моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)