12 сентябрь куни Чирчиқ олий танк қўмондонлик-муҳандислик билим юрти шахсий таркиби Ўзбекистон Республикаси Биринчи Президенти Ислом Каримов номидаги илмий-маърифий мемориал мажмуасига экскурсия уюштирди. Бу ҳақда Мудофаа вазирлиги матбуот хизмати «Дарё»га маълум қилди.
Унда Ўзбекистон Биринчи Президентининг рафиқаси Татьяна Каримова ҳам иштирок этди. «Бутун оламни жо қилган юрак» кўргазмасида бўлиб ўтган тадбир барқарорлик ва тараққиётнинг кафолати – Ўзбекистон Республикаси Қуролли Кучларининг асосчиси Ислом Каримовнинг хотирасига бағишланди. Татьяна Каримовага билим юрти курсанти томонидан яратилган Биринчи Президентнинг портрети, Ислом Каримов билан учрашиш бахтига муяссар бўлган яна бир курсантнинг шеърий тўплами ва бошқа турдаги эсдалик совғалари тақдим этилди.
Учрашув давомида Татьяна Каримова билим юрти қўмондонлиги ва курсантларга Ўзбекистон Республикаси Биринчи Президенти хотирасини ўзида акс эттирган китоб ва каталоглар ҳамда эсдалик кўкрак нишонларини топширди. Тадбир доирасида билим юрти музейи мудираси Шоҳиста Артикова Ислом Каримов номли эсдалик медали билан тақдирланди.
Курсантлар томонидан тайёрланган шеър, куй ва қўшиқлар учрашувнинг мазмунли ўтишини таъминлади. Тадбир сўнгида курсантлар мажмуа таркибидан ўрин олган кўргазмалар залида намойишга қўйилган рассом ва ҳайкалтарошларнинг санъат асарлари билан танишдилар.
Изоҳ (0)